Manne- ja luomečoaggima dutkanprošeavtta ulbmil, mii álggahuvvui 2019:s, lei gávnnahit maid manne- ja luomečoagginpráksis sisttisdoallá. Prošeakta lea iskan máhtu mii čatnasa daid praksisiide, ja mo dat máhttu ovdanbuktojuvvo gielas, muitalusain ja báikenamain.
Ođđa dutkan buktá oidnosii manne- ja luomečoagginmáhtu. Manne- ja luomečoggiid oktavuohta sin čoagginguovlluide boahtá ge ovdan muitalusain ja gielas.
Máhttu lea čadnon guovlluide gos sii vánddardit manne- ja luomečoakkedettiin. Ollugat čogget seamma guovlluin jagis jahkái, ja sii leat ge dat geat ovddemusat fuomášit rievdamiid. Ovdamearkka dihte leat palssat jekkiin dál nohkamin, man doivot dálkádatrievdama váikkuhussan.
Dutkanjoavku lea maŋemuš jagiid dutkan práksisiid mat leat čadnon luome- ja mannečoaggimii Sámi mearraguovlluin, nu go Porsáŋggus, Várjjagis ja Divttasvuonas. Dutkanbohtosat čájehit čielgasit ahte manne- ja luomečoaggin lea eanet go dušše iešalddis čoaggin. Lea mávssolaš máhttu mo hálddašit iežaset guovlluid.
Landscape Practices konferánsa lágiduvvo Guovdageainnus, Sámi allaskuvllas, čakčamánu 20. beaivvi. Doppe muitalit dutkit eambbo dutkanbarggu ja bohtosiid birra.
