Oarje-Finnmárkkus dieđihit politiijat feara makkár dáhpáhusaid birra.
Oarje-Finnmárkkus dieđihit politiijat feara makkár dáhpáhusaid birra.
Oarje-Finnmárkku politiijat dieđihedje buot dáhpáhusaid birra guđa áigge iđđes.
Jáhkke leat viessogaikomin
Stallogarggus, Fálesnuoris dieđihuvvui gaskaija áigge ahte muhtimat ledje gaikumin sisa muhtin návstui.
– Čájehuvvui leat boasttu áddejupmin, čállet politiijat dán birra
Ii jeagadan politiijaid
Hammerfeastta politiijat válde ges muhtin olbmo gitta, go ii lean jeagadan politiijaid gohččuma. Almmái váido.
Ribahan nohkkat
Diibmu 05.54 dieđihedje politiijat ahte leat šaddan fitnat muhtin stobo luhtte Honnesvágis.
Doppe lei muhtin gárren olmmoš ribahan nohkkat stobo olggobeallai.
– Olmmoš lea dolvojuvvon iežas ruktui, beassá joatkit siste oađđit, čállet politiijat.
Gohččo guođđit guovllu
Seamma áiggis dieđihedje politiijat ahte leat gohččon guoktása guođđit Álttá gávpotguovddáža, go ballet sudno sáhttit ráfehuhttit earáid.
Dolvo vuolleahkásačča ruoktot
Hammerfeastta politiijat doibme maiddái sáhtolažžan mannan ija, go dolvo muhtin vuolleahkásaš gándda ruoktot.
– Áiccaimet gándda gávpotguovddážis, son ii lean gárihuvvan, čállet politiijat.
Dán birra dieđihedje diibmu 05.56.
Suoládeigga vuollafáhta
Iđđes diibmu 05.57, dieđihedje politiijat ges ahte ledje ožžon dieđu doarrumiid birra Honnesvágis. Muhtimat galget leat doarrán taxi vuorddedettiin.
Politiijat fitne báikkis. Doronat eai lean šat báikkis go politiijat ollejedje, muhto politiijat gávdne daid dakka maŋŋil.
Guovttis dáin váiduiga go galgaba leat suoládan vuollaga muhtin olgobáikkis.
– Soai leigga oainnahallan guottašeamen vuollafáhta, čállet politiijat
Olgobáiki lea ožžon ruovttoluotta dávviriid.
Lobiheamet sevnnjodahttán glásaid
Diibmu 05.59 dieđihedje politiijat ahte leat váidán muhtin biilavuoddji Álttás, guhte lei lobiheamet sevnnjodahttán biilaglásaid.
Guokte feastta jaskkodahttán
Hammerfeastta politiijat leat mannan ija ferten fitnat guovtti stobus jaskkodahttimin feasttaid. Dán birra dieđihedje diibmu 06.00.
Gárrenoaivvis vujii mopedain
Álttás ges váide politiijat muhtin olbmo gean navdet gárrenoaivvis vuodján mopedain. Dán birra dieđihedje diibmu 06.05.
– Mii leat válddihan varraiskosiid olbmot, ja leat duoguštan vuodjenkoartta, čállet politiijat.