30-jahkásaš almmái lea huškon nuppi olbmo muhtin feasttas Leavnnjas.
Odne iđđedis bođii diehtu politiijaide ahte muhtin 30-jahkásaš almmái lea huškon nuppi olbmo dan oktavuođas go earát dáhtto su guođđit feastta. Dáhpáhus lea geavvan muhtin priváhta čujuhusas odne iđđedis. Skihpárat ledje šaddan mannat gaskii ja sirret sudno, twittre politiija.
Oaivi varddii
Álttá guovddážis lea dáhpáhuvvan veahkaválddálašvuohta, gaskal 20-jahkásaš ja 30- jahkásaš albmá sotnabeaivvi čuovganeamis diibmu 03.40. Nuppis varddii oaivi ja dolvojuvvui doavtterfáktii. Álttá politiijat čuovvulit ášši.
Oalle jaskat FInnmárkkus
Muđui leat politiijat šaddan gevret vihtta olbmo eret Álttá guovddážis, rikkerema ja gárrenvuođa geažil. Guokte albmá, 20-jahkásaš ja badjelaš 30-jahkásaš, eaba doahttalan gáibádusa ja politiijat váidet ášši, čállá politiija viidásat.
– Lea leamašan viehka jaskes idja Finnmárkkus. Leat leamašan guokte dieđu mat gusket rikkeremii Álttás, ja Girkonjárggas lea leamašan riedja muhtin priváhta čujuhusas, čállet politiijat twitteris.
