Sjalusiijadramat, ja doarrumat gos muhtimat gárte merrii lei oassin Finnmárkku politiijaid ijas. Sis eai lean návccat oba iskat ge buot áššiid.
Sjalusiijadramat, ja doarrumat gos muhtimat gárte merrii lei oassin Finnmárkku politiijaid ijas. Sis eai lean návccat oba iskat ge buot áššiid.
Mannan ija ii váilon politiijain gal bargu.
– Buorre miellaláhki
Nuorta-Finnmárkkus fitne politiijat dárkkisteamen olgobáikkiid, sihke Unjárggas, Deanus ja Donjevuonas ovdal gaskaija.
Politiijat dieđihedje olbmuid leat buori miellalágis.
Guččai almmolaš báikkis
Diibmu 00.24 de gávnnahalai muhtin gužžamin almmolaš báikkis Hammerfeasttas.
Olmmoš sáhkkohalai.
Doarrumat Álttás
Seamma áiggis ožžo ges Álttá politiijat dieđu ahte muhtimat ledje doarrán muhtin olgobáikkis Álttá gávpotguovddážis.
Dán áššis addojedje maid sáhkut.
Nu gárihuvvan ahte ii deaivan ruoktot
Veahá maŋŋelaš, Álttás, de muhtin taxivuoddji ges dieđihii politiijaide ahte sus lei olmmoš fáru guhte galgá leat leamaš badjelmeare gárihuvvan.
– Olmmoš ii máhtán čilget iežas čujuhusa, čállet politiijat.
Politiijaid twitterdieđus dattege ii čuoččo gal mo de geavai dáinna olbmuin.
Diggostalai
Váile ovttas ožžo ges politiijat dieđu muhtin olbmo birra Leavnnjas, Porsáŋggus, guhte maid galgá leamaš badjelmeare gárihuvvan ja diggostallat viggan.
Ii dán dieđus ge čuoččo maid dáinna dahke.
Feastariedja
Váile ovttas ožžo politiijat maid dieđu ahte Čáhcesullos lei feasta gos čuojahedje musihka hui garrasit ja huike jitnosit.
Politiijat gohččo dáid jaskkodit.
Badjelmeare gárihuvvon
Diibmu 01.14 šadde ges politiijat gohččut muhtin olbmo guođđit Girkonjárkka gávpotguovddáža, go dát olmmoš galgá maid leamaš badjelmeare gárihuvvan.
Gaikkodedje bartii
Diibmu 01.17 ožžo ges politiijat dieđu ahte muhtin barttas Riehponávžžis lei leamaš sisagaikun.
– Guokte skohtera ja aggregáhta leat suoláduvvon, dieđihit politiijat.
Doarrumat
Vaikke árat eahkedis lei buorre miellaláhki Donjevuona olgobáikkiin, de dat rievddai ija mielde.
Beal guovttis ihkku fitne politiijat fas muhtin olgobáikkis doppe, gos muhtimat ledje doarrán.
Sii gohččo doroniid guođđit báikki.
Guovdageainnus maid doarrájedje
Badjelaš beal guovttis ledje doarrumat maiddái Guovdageainnus, hotealla olggobealde.
Politiijat fitne čielggadeamen ášši ja čuovvolit ášši ain.
Bissehedje feastta
Diibmu 01.40 ledje ges politiijat muhtin dálus Bjørnevatnis, gos lei riedja ja garra musihkka.
Politiijat gohččo olbmuid jaskkodit, ja dat jeagadedje.
Gohččo guođđit báikki
Váile guovttis ges ráhkadii muhtin badjelmeare gárihuvvon olmmoš rieja Álttás.
Son gohččojuvvui guođđit gávpotguovddáža.
Dákka maŋŋil šadde politiijat ges fitnat muhtin priváhtadálus Álttás bisseheamen feastta.
Doarrumat Girkonjárggas
Birrasiid seamma áiggis ožžo ges politiijat dieđu muhtin olbmo birra guhte lei čorpmahallan ámadadjui.
Politiijat čuovvolit ášši.
Dakka maŋŋil ledje fas doarrumat muhtin eará sajis Girkonjárgga gávpotguovddážis, politiijat eai leat dieđihan mii dainna dahkkui.
Honnesvágis maid doarrumat
Diibmu 01.59 ledje ges muhtimat doarrán muhtin olgobáikkis Honnesvágis.
Sii maid ridje ja balde eará gussiid.
Politiijat bissehedje dán.
Badjelmeare gárihuvvan
Diibmu 02.17 šadde politiijat fas gohččut muhtin badjelmeare gárihuvvan olbmo guođđit Álttá gávpotguovddáža.
Gárrenvuođas vuodján
Diibmu 02.23 bissehedje ges politiijat muhtima gean navdet gárrenvuođas vuodján.
Olmmoš váldui gitta ja dás ásahuvvo ášši.
Gárttai merrii doarrumiin
Beal golmmas ihkku ledje fas doarrumat Honnesvágis, dán vuoro lei oalle duođalaš dáhpáhus.
– Doarrumis ledje vihtta olbmot. Ovtta šadde gádjut mearas bajás, guovttis gárttaige doaktára lusa, čállet politiijat.
Politiijat čuovvolit ášši.
Sjalusiijadrama
Badjelaš golmmas roasmmehuvai ges muhtin olmmoš veahá, maŋŋil muhtin sjalusiijadrama.
Politiijat hálahedje beliid buorránaddat.
Eai lean návccat iskat
Diibmu 03.19 ožžo politiijat dieđu ahte muhtin olmmoš Porsáŋggus orui ártegit vuodjimin, muhto politiijain eai lean návccat iskat dán ášši.
Diibmu 03.42 ožžo ges politiijat dieđu muhtima birra gean navdet gárrenvuođas vuodján Donnjevuonas.
Politiijain eai lean návccat iskat dán ášši ge.
Váile beal viđas ožžo politiijat fas sullasaš dieđu Fálesnuoris, sis eai lean návccaŧ dan ášši ge iskat.
Vuoddjáiga báhtui
Váile viđas manne ges guokte njealljejuvllaga báhtui go politiijat vigge daid bissehit dárkkistan dihte.
