Odne roasmmehuvai mánná mánáidgárddis Kárášjogas.
Okta mánná roasmmehuvai odne gaskabeaivveáigge Láttošluohká mánáidgárddis. Mánáidgárddi bargit válde vára mánás ja ambulánsa oktan doaktáriin gohččojuvvui báikái. Dan dieđiha Kárášjoga gieldda várresátnejođiheaddji Solveig Boine Nikkinen preassadieđáhusas. Preassadieđáhusas ii čilge várresátnejođiheaddji lagabuidda mot mánná roasmmehuvai, iige Ávvir leat su fáhten ságaide dán áššis.
Áigo ihttin fas mánáidgárdái
Mánáidgárdi attii dalán dieđu máná váhnemiidda. Dál lea mánná buori vuoimmis, ja várresátnejođiheaddji muitala ahte mánná lea lohkan ahte áigu ihttin fas mánáidgárdái stoahkat iežas skihpáriiguin.
Ságastallat heahtejoavkkuin
Kárášjoga gieldda bealis áigot juohkit dieđuid eará váhnemiidda geain leat mánát dán mánáidgárddis, ja lohket maid ahte sii geaidda dát guoská sáhttet ságastallat gieldda heahtejoavkkuin, jus lea dárbu.
