Mánná lei olgun stoahkame go šearfa čavggai čeabeha birra. Dan duođašta gielda.
Duorastaga lihkohisvuohta mas viđajahkásaš bártnáš roasmmehuvai Láttošluohká mánáidgárddis, lei nu vearrái ahte ambulánsa oktan doaktáriin gohččojuvvojedje báikái. Manai bures mánáin ja beaivvi maŋŋel lei son fas mánáidgárddis.
Mánát fuomášan
Kárášjoga gielda dat eaiggáduššá mánáidgárddi , ja gielda duođaštit dán leat dáhpáhuvvan go mánát ledje stoahkame olgun beaivet. Ávvira dieđuid mielde galgaba guokte máná fuomášan ahte bártnáš lea heađis, ja muitalan de rávisolbmuide.
Duođašta measta buvvon
Ikte ii čilgen Kárášjoga gieldda várresátnejođiheaddji Solveig Boine Nikkinen preassadieđáhusas juste mot mánná roasmmehuvai. Son ii loga bearjadaga ge iežas muitalit juste mii lea dáhpáhuvvan, muhto go Ávvir jearrá sus lea go mánná measta buvvon go šearfa čavggai čeabeha birra, vástida ná:
– Juo. Dien mun gal dieđán, muhto daid detáljjaid máná birra in daja gal maidege. Lea surgat go mánná roasmmehuvai, dat ii leat leaika, ja giittán Ipmila go manai ná bures. Detáljjaid gal ferte hálddahus muitalit, dadjá Boine Nikkinen.
Bealušta mánáidgárddi
Kárášjoga ráđđeolmmái Elfrid Boine lea čoahkkinastán váhnemiiguin mánáidgárddis maŋŋel dáhpáhusa. Son maid vástida «juo», go jearrat lea go mánná measta buvvon šerfii, muhto doamiha lasihit:
– In hálit vuđolaččat muitalit aviisii mii lei bárti, muhto bargit leat bargan buori barggu mánáiguin, buohccidivššáriiguin ja doaktáriiguin, dadjá son.
Boine lohká buot bargiid leamaš barggus dan mánáidgárddis duorastaga, ja sis leat lága mielde maid doarvái bargit mánáidgárddis. Son lohká sin dál árvvoštallat dáhpáhusa ja das áigot váldit oahpu.
– Gos bargit ledje go šearfa čavggai?
– In dieđe mii leaš sivva, muhto mánát ledje olgostoahkamis. Mii leat bargan dan maid galggaimet bargat.
– Movt hehttet ná dáhpáhuvvá nuppes?
– Buot mánáidgárddiin lea vuogádat maŋŋel dákkár vásáhusaid, de gehččet makkár doaimmaid bidjet johtui vai duot ja duot vásáhus ii dáhpáhuva.
– Nu ahte dál galget eambbo čalmmis atnit mánáid?
– Dan mii gal dahkat čađagaskka.
Máná váhnemat eaba hálit searvat, go lohkaba háliidit suddjet máná.
Ášši ii leat dieđihuvvon politiijade, eai ge politiijat dieđe dan birra maidege. Nu muitalit sihke Nuorta-Finnmárkku politiijaid operašunguovddážis ja maiddái Kárášjoga leansmánnikantuvrras.
