Namma: Isabel Kemi
Ahki: 19
Guovlu: Guovdageaidnu
1. Mii lea Suoma alimus várri?
– Hm … In dieđe váriid namaid.
In dien gal hálit árvidit ge. Boastut!
Rievttes vástádus: Halti/Háldečohkka
2. Galle fylkka leat Norggas?
– Naa … 18. Riekta!
3. Gii čálii girjji «Muitalus
sámiid birra?»
– Lei go son dat Áillohaš? Boastut!
Rievttes vástádus: Johan Turi
Isabel oaččui ovtta čuoggá álgogažáldagain, iige beasa de liigegažaldagaid vástidit. Son beassá liikká válljet árvádusaid maiguin sáhttá fasket 5,10, dahje 15 čuoggá. Dat lea dan duohken makkár ivnni vállje. Jus vástida riekta, de oažžu: Rukses árvádus lea váddáseamos ja das oažžu 15 čuoggá, alit árvádusas 10 čuoggá, ja ruonás fas 5 čuoggá.
Isabel vállje alit ivnni, ja mii jearrat sus dán árvádusa:
Gii lea dat gii lea mu váhnemiid nieida, muhto aŋkke ii leat mu oabbá?
– Na, dat gal ferten leat mun ieš. Riekta!
Galle čuoggá oktiibuot: 11 čuoggá.
– Lei somá searvat, muhto ledje dakkár jearaldagat maid in diehtán.
Juohke gilvaleaddji beassá hástalit ođđa gilvaleaddji Ávvira geassegilvui. Kemi háliida hástalit Tom Ánte Sara searvat Ávvira geassegilvui.
– Háliidan hástalit Tom Ánte Sara. Hui somá jus son searvá!
