-Almmuhus-
-Almmuhus-
OĐĐASATMaŋidit gohttenbáikkiid ođđa sihkarvuođanjuolggadusaid

Maŋidit gohttenbáikkiid ođđa sihkarvuođanjuolggadusaid

-

-

Suoidnemánu 1.beaivvi galge ráđđehusa ođđa sihkarvuođanjuolggadusat gohttensajiin leat doaimmas, muhto dál leat bissehan doaimma álgimis vuos.

Ođđa njuolggadusaid gulaskuddamis lei áigemearri miessemánu 4. beaivvi ja lei oaivil álggahit ođđa njuolggadusaid suoidnemánu 1. beaivvi dán jagi.

 

Áigi ráhkkanit dasa

Eanet gulaskuddaninstánssat leat cealkán ahte leat vuorjašuvvan dasa mii dáhpáhuvvá jus ođđa njuolggadusat galget doaibmagoahtit gasku áigodaga go lea hušša, ja dat lea okta sivain go leat maŋidan álggaheami.

– Rievdadus galggai doaibmagoahtit suoidnemánu 1. beaivvi 2019 rájes, muhto mihttu lea gaskaboddosaččat bissehuvvon vai ealáhusas lea áigi buoret ráhkkanit dasa, lohká gielda- ja ođasmahttindepartemeantta stáhtačálli Thorleif Fluer Vikre.

 

Guhkidit gaskka vovnnain

Ođđa sihkarvuođanjuolggadusaid gohttenfitnodagaide galgá leat álki ipmirdit ja čađahit sihke eaiggádiidda ja gohttensaji geavaheddjiide.

Earret eará lea nu ahte gohttenovttadaga definišuvdna lea eanet čilgejuvvon dál go ovdal lei, dan geažil go leat ollugat geat eai šat geaset gohttenvovnna báikkis báikái, muhto guđđet gohttenbáikái gos oažžu orrut guhkit áigge, ja masa lea heivehuvvon sihke visoš, láhtti ja áidi.

Ođđa njuolggadusain lassána gáibádus man guhkes gaska galgá vovnnain, go lassána golmma mehteris njealji mehterii. Dál leat dát njuolggadusat dulkojuvvon iešguđetládje suohkanis suohkanii.

 

– Ballu

Maŋŋel go golmmas ovtta bearrašis dušše Sokn gohttenbáikkis diibmá, de gáibidedje eambbogat čielgaset njuolggadusaid.

– Eambbogat ealáhusas eai leat sihkkarat makkár váikkuhusat evttohuvvon rievdadusain šaddet. Dat buktá balu. Daid vuorjašuvvamiid váldit duođalaččat. Dan dihte áigut bidjat buori áiggi geahčadit cealkámušaid mat leat boahtán. Dat lea maid nu ahte ii leat šat áigeguovdil bidjat ođđa njuolggadusaid doibmii suoidnemánu 1.beaivvi rájes, lohká Vikre.

Ii leat vuos biddjon ođđa dáhton ođđa lága doaibmama álggaheapmái.

(©NTB)

 

-Almmuhus-