-Almmuhus-
OĐĐASATMaŋidedje áššáskuhttinčoahkkima goddináššis

Maŋidedje áššáskuhttinčoahkkima goddináššis

-

-

Áššáskuhttinčoahkkimis ikte mearriduvvui guhkidit áigemeari vahkkuin go áššáskuhtti advokáhtta dárbbaša eanet dieđuid oažžut áššis.

Skábmamánu 23. beaivvi galggai leat čoahkkin gos biddjo áššáskuhttinmearrádus goalmmátlot-jahkásaš Guovdageainnu dievddu vuostá gii sivahallo goddán nuppi dievddu Skiellet báikkis, Davvi-Ruoŧas.

Áššáskuhtti advokáhtta dárbbaša eanet dieđuid áššái, ja bivddii áššáskuhttinčoahkkima maŋidit ovttain vahkkuin.

Ođđa áššáskuhttinčoahkkin dollojuvvo boahtte gaskavahkku, skábmamánu 30. beaivvi, muitala Sverige Radio.

 

Gávppašeapmi šattai goddináššin

Ávvir lea ovdal čállán ášši birra gos goalmmátlot-jahkásaš Guovdageainnu dievdu lea Skiellet (Skellefteå) báikkis, Davvi-Ruoŧas, várohuvvon goddán nuppi dievddu golggotmánu 10. beaivvi čuovganeapmái.

Báikkis galgá maid leamašan fárus okta eará dievdu, Guovdageainnu dievddu, ja vel njeallje ruoŧŧelačča, guokte dievddu ja guokte nieidda.

Su olmmái, gii lea goalmmátlot-jahkásaš, maid váldui gitta, muhto beasai dakka maŋŋel luovos, go ii galgga leat moktege goddimis leamaš mielde.

Buot golmmas dain ruoŧŧelaččain váldojedje gitta, várohuvvon galgan rievidit ruđa Guovdageainnu dievddus ja su olbmás.

 

Dieđuid mielde galggai čađahuvvot narkotihkkagávppašeapmi dan eahkeda, ja dan vuođul šattai stuibmi gos okta dain dievdduin čukkohalai niibbiin, čállá Sveriges Radio.

-Almmuhus-