Gáivuonas ledje váhnemat ásahišgoahtán Risttalaš priváhtaskuvlla go suohkanpolitihkkárat áigo rievdadit skuvlastruktuvrra. Dál sii leat bissehan barggu dassážii go sii oidnet maid ođđa suohkanstivra dahká.
Gáivuonas ledje váhnemat ásahišgoahtán Risttalaš priváhtaskuvlla go suohkanpolitihkkárat áigo rievdadit skuvlastruktuvrra. Dál sii leat bissehan barggu dassážii go sii oidnet maid ođđa suohkanstivra dahká.
– Mii gal leimmet juo skuvlavistti gávdnan ja almmuhan oahpaheaddjevirggiid Risttalaš priváhtaskuvlii man mii áigguimet ásahit go suohkanpolitihkkárat mearridedje heaittihit Nieidaluovtta skuvlla. Midjiide bohte ollu gelbbolaš ohccit ja mis lei áigumuš álggahit skuvlla dán čavčča juo. Muhto go skuvladigaštallan bisánii, ja politihkkárat gesse mearrádusa heaittihit Nieidaluovtta skuvlla, de mii maŋideimmet iežamet skuvlaplánaid, muitala Risttalaš priváhtaskuvlla stivrajođiheaddji Johan Matheus Triumf.
Inšenevrrat guorahallan
Risttalaš priváhtaskuvlla stivra oastalii Nieidaluovtta skuvlla Gáivuona suohkanis, muhto suohkan ii mieđihan vuovdit skuvlla. Dan oktavuođas ohcagohte sii skuvlavistti ja gávdne giliviesu Gáivonávžžis mii lei doarvái stuoris skuvlavistin. Stivra láigohii de ovtta inšenevraásahusa guorahallat mii galgá dahkkot visttiin ovdal go šaddá dohkálaš skuvlavistin.
– Inšenevrrat cuiggodedje dušše smávvadiŋggaid nu go uvssaid sturrodagaid ja vejolašvuođa juvlastuolu geavaheddjiide beassat sisa, ovdal go lea dohkkehuvvon skuvlavistin. Dan gal ii leat beare váttis divvut, nu ahte mis gal lea buorre skuvlavisti, muitala Triumf.
Eai leat heaittihan
Triumf muitala maid ahte sii eai leat heaittihan skuvlaplánaid Risttalaš priváhtaskuvlla álggahit, ja barget ain viidáset.
– Stivra gávnnahii ahte lea buoremus skuvlamánáide ahte mii maŋidit skuvlaálggu go Risttalaš priváhtaskuvlla stivra dárbbaša veháš buoret áiggi go mis lei dán čakčii. Mii háliidit maid bargat searválaga sihke skuvlamánáiguin ja maid Nieidaluovtta skuvlla rektoriin ja oahpaheddjiiguin, ja dán čavčča mii mearridit movt mii bargat viidáset. Plánas lea álggahit skuvlla boahtte čavčča, dadjá Risttalaš priváhtaskuvlla stivrajođiheaddji Johan Matheus Triumf.
(Ášši lea almmuhuvvon báberaviissas 22.08.15)
