-Almmuhus-
OĐĐASAT Maŋidan dáiddaskuvlla duopmobeaivvi

Maŋidan dáiddaskuvlla duopmobeaivvi

-

-

Kárášjoga dáiddaskuvlla stivrras lea odne čoahkkin gos mearridit giddejit go skuvlla.

Odne duorastaga galgá Kárášjoga dáiddaskuvllas leat stivrračoahkkin, mas mearridit giddejit go skuvlla. Stivrrajođiheaddji Ingunn Utsi lohká iežas evttohit ahte maŋidit mearrádusa juovlamánnui, dassái go fylkkagielda lea dahkan mearrádusa.

Utsi goittot ge deattuha ahte stivra dat loahpalaččat mearrida áššis.

 

Ruhtavátnivuohta

Dáiddaskuvllas lea ruhtavátnivuohta ja dárbbašit 630 duhát ruvnnu vai eai dárbbaš giddet skuvlla gaskan skuvlajagi. Sii leat ohcan doarjaga sihke Kárášjoga gielddas, Sámedikkis ja Finnmárkku fylkagielddas.

Kárášjoga gielda ja Sámediggi leaba miehtan juolludit 250 duhát ruvnnu goabbáge, muhto eaktudit ahte maiddái dat fylkkagielda juolluda heahtedoarjaga.

Ievttá Ávviris lohke fylkagieldda bealis ahte eai suitte doarjut Kárášjoga dáiddaskuvlla.

 

Soitet liikká juolludit

Dál dattege dieđiha Finnmárkku fylkkavárresátnejođiheaddji Ragnhild Vassvik NRK Sápmái, ahte sii dattege soitet sáhttit juolludit 250 duháha dáiddaskuvlii, muhto ahte sii eai nagot das dahkat mearrádusa otnážii.

Vassvik muitala iežaset sáhttit meannudit ášši bušeahttaproseassas man meannudit juovlamánu 10. beaivvi.

 

Ávvir čuovvu ášši.

- Advertisement -
-Almmuhus-