-Almmuhus-
OĐĐASATMáŋggat biilalihkohisvuođat – muhto dábálaš dálvesiivu

Máŋggat biilalihkohisvuođat – muhto dábálaš dálvesiivu

-

-

Bearjadaga rájes leat leamaš davvin ollu biilalihkohisvuođat go biillat beaškkehit oktii, muhto geaidnodoaimmahagas lohket dál dábálaš dálvesiivvu.

Oarje-Finnmárkku politiijaguovllu operašuvdnajođiheaddji, Leif Magne Thomassen, lohká bearjadaga rájes leat dieđihuvvon guhtta smávit ja stuorát biilalihkohisvuođa guovllus.

 – Seammás leamašan eará áššit maid eat leat registreren, nu go ovdamearkkadihti guorbmebiillat mat leat darvánan. Lea go dat erenomáš ollu dan in sáhte kommenteret, muhto dás duos vásihat ollu lihkohisvuođaid. Maŋemuš beivviid leamašan máŋggat lihkohisvuođat, muhto sivaid mii eat dieđe, lohká Thomassen.

 

Máŋggat bárttit

Oktiibuot leat leamaš bearjadaga rájes guhtta biilalihkohisvuođa main biillat leat beaškkehan oktii. Okta Romssa fylkkas, gos njealjis roasmmehuvve. Muđui Finnmárkkus vihtta oktiibeaškkeheami. Dain bárttiin leat gávccis lápmahuvvan ja okta dievdu duššan.

 

Loga: Dievdu duššai biilalihkohisvuođas Reaisavuonas

 

Dábálaš dálvesiivu

Vaikke leat ollu biilalihkohisvuođat leamaš, de eai loga erenoamáš heajos siivvu Norgga davimus fylkkain. Stáhta geaidnodoaimmahaga fáktaoperatevra Grethe Turmo Hattem ii loga sidjiide dieđihuvvon váttis vuodjinsiivvu Finnmárkkus, ii ge Romssas.

 – Lea dábálaš dálvesiivu, ii leat goit eará diehtu boahtán midjiide. Leat gal leamaš oanehis áiggi bievlageainnut, ja dál lea veaháš muohttán ja geaidnu jikŋon. Danne soaitá muhtun sajiin gálja, muhto nu go mun dajan, de eat leat ožžon dieđuid ahte lea erenomáš váttis vuodjinsiivu guovllus, dadjá son. Hattem lohká iežaset oaidnán ahte Reaisavuonas, gos duššai olmmoš, lohket politiijat geainnu gáljan.

-Almmuhus-