Olu boares olbmuide lea čuohcan korona. Máŋggat suohkanat Romssas ja Finnmárkkus leat ožžon doarjagiid lágidit deaivvademiid boaresolbmuide. «Inn på tunet» ja «Ut på vidda» leat oasit daid fálaldagain.
Maŋemus mánuid leat ge garrasit gáržžiduvvon deaivvadanvejolašvuođat olbmuide ja deaivvadanbáikkiin leat uvssat lássejuvvon. Dearvvašdirektoráhtta almmuhii čakčat doarjagiid boaresolbmuid váste geat leat gártan váttes dillái. Ulbmil doarjagiin lea lágidit deaivvademiid boares olbmuide vai eai dárbbaš nu ollu okto.
Romssas ja Finnmárkkus besset boaresolbmot galledit oapmedáluid ja leat mielde dállobargguin. Eará báikkiin ges bohtet elliiguin daid boaresolbmuid lusa geat eai sáhte vuolgit mielde.
Seammalágan fálaldat lea maid sámi boaresolbmuide. Sidjiide lea earenoamáš lágidit aktivitehtaid main lea guovddážis giella ja kultuvra nu go juoigan ja sámi borramušat. Dan čállá preassadieđáhusas Romssa ja Finnmárkku fylkkamánni.
