Badjel logi jagi lea Kárášjoga gielda ovttas Scandic Hoteallain lágidan juovlamállásiid sidjiide geat ovdal ledje ja sidjiide geat dál leat darvánan gárrenmirkkuide. Odne lea fas áigi návddašit njálgga juovlabiepmu.
Jahkásaččat lágida Kárášjoga gielda ovttas Scandic Hoteallain juovlamállásiid olbmuide geat leat darvánan iešguđetlágan gárrenmirkkuide.
Ođđa direktevra joatká
Dát juovlamállásat leat juo šaddan juovlaárbevierrun Kárášjogas, mainna Scandic Hotealla ođđa direktevra háliida joatkit.
Dainna lea Odd Markussen, gii bargá Kárášjoga gielddas gárrendiliin ja psyhkalaš dearvvašvuođain, giitevaš.
– Mii leat hui buoremielas go dát juovlabeavdi bistá ain vaikko boahtáge ođđa direktevra hotellii, lohká Markussen.
Máŋgasidda suohttaseamos dáhpáhus jagis
Maiddái ihttin, distaga juovlamánu 10. beaivvi, lea fas áigi dáid juovlamállásiid návddašit.
Oallugiid mielas, geat bohtet juovlamállásiidda, leat dát doalut okta dain buot suohttaseamos dáhpáhusain jagis.
– Ii leat buohkain juovlabiebmu njuni vuolde. Go juovllat lahkonit, de lea maid áigi juovlaárbevieruide ja juovlabibmui. Oallugiin sis ii leat dát vejolašvuohta, earret eará go oallugat orrot iehčanassii, lohká son.
Suohtastallet ja návddašit njálgga biepmu
Dát juovlamállásat leat Kárášjoga gieldda ja Kárášjoga Scandic Hotealla ovttasbargu, dasa lassin ahte sihke girku ja eaktodáhtolašguovddáš leat searvan bargui Distatolbmážiiguin.
Buot logi jagi go dát mállásat leat guossohuvvon, lea Scandic Hotealla skeŋken mállásiid, ja nu maiddái dán jagi.
Markussen muitala dán jagi guoktelogi olbmo dieđihuvvon searvat juovlamállásiidda.
Distatolbmážat
Distatolbmážat, dahje «Tirsdagskameratene» lea vuosttašceahkkefálaldat sihke sidjiide geat leat leamaš ja leat ain darvánan iešguđetlágan gárrenmirkkuide.
Dábálaččat, earret juovlamállásiid oktavuođas, deaivvadit distatolbmážat vahkkodaččat humadan ja boradan dihte, seammás go sidjiide leat doaimmat biddjon.
Muhto maŋemuš áiggiid ii leat dát doaibma doaibman aibbas bures.
– Distatolbmážat lea doaibman Kárášjogas juo vissa 15-20 jagi, mii lea deaivvadanbáiki vahkkosaččat olbmuide geat leat sihke ovdal leamaš ja dál leat darvánan gárrenmirkkuide. Lea šaddan váddáseabbon oažžut olbmuid boahtit deaivvademiide, nu ahte dál ii leat šat doaimmas juste dál, lohká Markussen.
Dehálaš deaivvadanbáiki
Vaikko Distatolbmážat ii leat doaimmas juste dál, de lohká Markussen dáid juovlamállásiid dehálaš deaivvadanbáikin.
– Suohkana bealis mii dieđosge čuovvolat sin geat leat darvánan gárrenmirkkuide, ja dát juovlamállásat leat hui dehálaš deaivvadanbáikin sidjiide. Sosiála bealis lea máilmme olu dadjamuš, lohká son.
