Buohkat besse heakkas go Gilbbesjávrri skuvla Eanodagas bulii gutnan otná čuovganeapmái.
Buohkat besse heakkas go Gilbbesjávrri skuvla Eanodagas bulii gutnan otná čuovganeapmái.
Sullii 50 olbmo ledje idjadeamen skuvllas ja buohkat sis besse heakkas. Skuvlla olggobealde buollái biila ja das leavai buollin skuvlii. Dán čállá NRK Sápmi.
– Sii eai dieđe vel manne biila buollái ja sii áigot dieđusge ain dutkat ášši muhto buot deháleamos lea ahte buohkat besse heakkas, lohká doaibmi buollinčáskadanhoavda Eanodaga, Muoná ja Kolari gielddain, Pekka Väliheikki.
Oaggungilvu
Gilbbesjávrris lea dáid basiid stuorát oaggungilvu ja skuvllas ledje orrumin gilvvuid oasálastit.
Buollinčáskadeaddjit bohte báikái álggos vuos ovttain buollinčáskadanbiillain. Dasto bohte maid buollinčáskadeaddjit Ivgubađas Norggas ja Muonios, muhto ii lean vejolaš čáskadit buollima go skuvla bulii hui johtilit.
Lágideaddjit dieđihit ahte oaggungilvvut čađahuvvojit lihkká go nu ollugat leat boahtán guhkkin gilvvuide.
Olbmot geat galge idjadit skuvllas leat álgovuorus sirdojuvvon muhtin boradanbáikái Gilbbesjávrris.
Veahkkečáskadeaddjit
Omasvuonas bohte buollinčáskadeaddjit veahkkin, muhto lei jo measta buot gutnan jo buollán ovdal go ollejedje.
– Lea oalle mátki vuodjit Omasvuonas Gilbbesjávrái, muitala buollinčáskadanjođiheaddji Omasvuonas Vidar Forsaa Nordlys aviisii.
–Ledje ollu olbmot geahččame go jáddadeimmet buollima, ja dat manai oalle bures.
Lei campingbiila mii buollái skuvlla olggobealde čállá Hufvudstadsbladet
Skuvllas leat 16 oahppi beaivválaččat, ja doppe lea dearvvašvuođaguovddáš ja lášmmohallanlatnja. Hufvudstadsbladet dieđiha ahte ledje birrasiid 80 olbmo geat ledje idjadeame skuvllas, ja buohkat besse heakkas.
