-Almmuhus-
-Almmuhus-
OĐĐASATMáŋga hehttehusa rádjesuohkaniid ovttasbarggus

Máŋga hehttehusa rádjesuohkaniid ovttasbarggus

-

-

Gielddaidgaskasaš ovttasbargu Norgga ja Suoma gaskkas doaibmá bures máŋgga bealis, muhto leat ain stuora hástalusat.

Davvikalohttaráđđi, maid Finnmárkku fylkkagielda jođiha, deaivvadii mánnodaga ovddit vahkku Norgga ja Suoma rádjesuohkaniid ovddasteddjiiguin, gulahallat ovttasbarggu birra. 

Erenoamážit oahpahusa, dearvvašvuođa ja bargomárkana osiin ságastallojuvvui.

25 ovddasteaddji ledje boahtán Deanus, Kárášjogas, Guovdageainnus, Anáris, Ohcejogas ja Eanodagas, digaštallat vejolašvuođaid ja hástalusaid, dieđiha Finnmárkku fylkkagielda preassadieđáhusas.

 

Sávvá eanet ovttasbarggu

Ráđi jođiheaddji, Remi Strand, muitalii ahte lea ain dárbu Davvikalohttaráđi rádjebálvalussii, dan dihte go leat máŋga hástalusa mobilitehta ektui.

– Sihke buollinčáskadeddjiin, vuodjanfaláštallamis ja eaktodáhttoguovddážiin lea buorre ovttasbargu. Hástalusat leat dávjá jearaldagat mat gullet verrui, oadjodivadii, fástadoaktárii, buohccindieđiheapmái ja buozalmasruđa hárrái. Nu go Dánmárkku ja Ruoŧa gaskkas lea dahkkon šiehtadus mii guoská verrui. Sullasaš šiehtadus galggašii dahkkot Norgga ja Suoma ja Ruoŧa gaskkas maid, vai buorida mobilitehta ja nanne bargomárkana, oaivvilda Strand.

Rádjebálvalus veahkeha priváhta ja ealáhusa geat čađahit doaimmaid goappašat bealde ráji. 

 

Eai dovdda ránnjásuohkaniid nu bures

Ohcejoga ráđđeolmmái Vuokko Tieva-Niittyvuopio oaivvilda ahte Norga ja Suopma ii dovdda nubbi nuppi nu bures, ovdamearkka dihte dearvvašvuođa ja fuollasuorggis.

Ohcejogas leat báikkálaččat álgán gulahallat guovddáš eiseválddiiguin, movt sáhttet buoridit mobilitehta ráji rastá.

Čoahkkimis mannan vahkku bođii ovdan ahte leat stuora erohusat Norgga ja Suoma gaskkas, nu go skuvlasuorggis.

Lea maid stuora potensiála oahpahusovttasbarggus, ja lassin dearvvašvuođa ja fuolahusas, bargomárkanis ja nuoraidbarggus.

 

Evttohedje oktasaš doaimmaid

Gielddaidgaskasaš ovttasbargu mii guoská sámi álbmoga bálvalusaide, namuhuvvui leat dakkár oassin mii sáhttá šaddat buoret jus lea lagat ovttasbargu.

Čoahkkimis lohke maid ahte suohkaniin leat seammá sullasaš hástalusat.

Rádjebálvalus čilgii maid ahte sin bargu lea veahkehit rádjehehttehusgažaldagaid ja ávžžuhedje oasseváldiid váldit singuin oktavuođa. 

Čoahkkimis bukte evttohusaid lágidit oktasaš kurssaid gielddabargiide mat gullet gieldda surggiide, oktasaš doaimmaid dáhpáhusaid ektui maid eai leat háliidan, oktasaš bargu mátkeealáhusa ektui, diehtojuohkinbálvalus ja oktasaš gelbbolašvuođavuorká.

-Almmuhus-