-Almmuhus-
OĐĐASATMáŋga divre­šlája sáhttet jávkat

Máŋga divre­šlája sáhttet jávkat

-

-

Máilmmis lea divrriin heahtedilli. Dutki várre ahte váikkuhusat sáhttet šaddat roassun olmmošsohkagoddái.

Miljovnna šlája sáhttet jávkat, ja bealli dain leat divrrit.

– Divrejápminheahtedilli addá garra vuorjašumi. Mii diehtit beare oasi heahtedilis, dadjá biologa Pedro Cardoso, gii bargá Helsingfors luondduhistorjjálaš museas Suomas.

Son lea girječalli dutkamis mii almmuhuvvui disdaga Conservation Biology áigečállagis.

500 miljovnna jagis lea máilbmi vásihan olu šládjajávkamiid. Maŋemus dáhpáhus lei 66 miljovnna jági áigi, dalle jápme dinosaurat.

Dál vásiha planehta fas ođđa šládjajávkamiid, ja dán háve lea olmmošsohkagoddi mii dagaha dan, celket dutkit.

– Olbmuin lea ovddasvástádus measta buot divrrepopulašuvnna njiedjamis ja jávkamis, dadjá Cardoso.

Váldosivva lea go divrriid eallinguovllut jávket, dasto čuovvu nuoskkideapmi, go geavahit ávdnasiid maid divrrit eai gierdda ja sisafievrridit ođđa šlájat guovlluide gosa eai gula. Dálkkádatrievdan váikkuha maid šládjajávkamii. 

-Almmuhus-