Mannan lávvordat lei maŋemus geardi go lávvordat-Ávvir almmuhuvvui. Dán vahkku rajes rivdet Ávviris almmuhanbeaivvit.
Mannan lávvordat lei maŋemus geardi go lávvordat-Ávvir almmuhuvvui. Dán vahkku rajes rivdet Ávviris almmuhanbeaivvit.
Distribušuvdnaváttisvuođaid geažil lea lávvordat dagahan olu lohkkiid duhtameahttumin.
– Mii leat mearridan heaitit lávvordataviissain go nu oallugat min lohkkiin leat duhtameahttumat go distribušuvdnaváttisvuođaid geažil eai oaččo lávvordataviissa rievttes beaivvi, namalassii lávvordaga, dadjá Ávvira váldodoaimmaheaddji, Kari Lisbeth Hermansen.
– Váttisvuohta šattai maŋŋel go Poasta ii šat distribueren lávvordagaid, ja šattaimet geavahišgoahtit eará fitnodaga dan sadjái, erenoamážit Guovdageainnus ja Kárášjogas, dadjá Ávvira IT-ovddasvástideaddji, Per Christian Biti.
Muhto, dat ii mearkkaš ahte mii unnidit aviisaalmmuhanbeivviid. Ávvir almmuhuvvo ain vihtta beaivvi vahkkus.
– Dassážii lea Ávvir almmuhuvvon beaivválaččat disdagas lávvordahkii. Boahtte vahkku rájes rivdet almmuhanbeaivvit ja Ávvir ilbmagoahtá mánnodagas bearjadahkii, muitala Hermansen.
Aviisa ii rievdda
Vaikko rievdadit almmuhanbeivviid, de ii rievdda aviissa sisdoallu ja hápmi vuos. Bearjadataviisa šaddá ođđa vahkkoloahppaaviisa mas leat eanet siiddut go eará beivviid.
Seastit veaháš
Ii leat čiegusvuohta ahte dainna seastit maid ruđa mii boahtá lohkkiide buorrin.
– Go heaitit lávvordataviissain, de seastit maid veaháš, ja daid ruđaid beassat baicce geavahit doaimmahussii, nannet aviissa sisdollui ja nannet min neahttafálaldaga. Dat boahtá loahpa loahpas eanet ávkin lohkkiide, oaivvilda Kari Listbeth Hermansen.
Neahtta ii rievdda
Dát rievdan ii čuoza nehttii ja neahtas galget ain leat seamma fálaldagat mat dán rádjái leat leamaš.
– Mediamáilbmi ja geavaheddjiid mediadábit rivdet jođánit ja neahttafálaldagat šaddet eanet ja eanet dehálažžan. Danne lea dehálaš ja dárbu ahte mis maid lea buorre neahttafálaldat mas jođánit almmuhit dáhpáhusođđasiid, dadjá Hermansen.
– Vaikko aviisabeaivvit rivdet, de ii neahtas gal áktánasat dat gal vuhtto, mis han gal lea seamma fálaldat go muđui. Diehttelasat go dien guoktás seastá ruđa, de mis lea boahtteáiggis vejolašvuohta fállat vel buoret fálaldaga neahtas go dál dahkat, lasiha Ávvira neahttajođiheaddji Berit Marie Lise Eira vel loahpas.
