Ođđa dutkan lea čađahuvvon mánáid dili birra, ja da vuorjašuhttá fágaolbmo.
Dutkama lea Máilmmeviidosaš dutkanfitnodat IPSOS čađahan Norgga olgoáibmodoaimmahussearvvi ovddas Norggas mánáid gaskkas.
Logut čájehit ahte dušše 18 proseantta mánáin leat olgun gaskal viđa ja čiežagearde vahkus. Jus buohtastahttá 2015 iskkademiin, de dalle ledje 41 proseantta mánáin olgun stoahkame gaskal viđa ja čiežageardde vahkus.
Dat mearkkaša ahte badjel beali unnit mánát stohket olgun jus buohtastahttá iskkademiin mii čieža jagi áigi, 2015:s, dahkkui.
Norgga olgoáibmidoaimma generálačálli, Bente Lier, lohká ahte dađi bahábut dat čájeha seamma tendeanssa go eará iskkadeamit maid čájehit. Son lohká ahte okta vejolaš čilgehus lea ahte mánáin leat maid rievdan dábit pandemiija-áigodagas, go leat eanet siste leamašan ja maid eanet dihtormašiinnaiguin čohkkán, ja dan sáhttá váttis jorgalahttit.
Vuorjašuhttá
Agder universitehta dearvvašvuođa- ja falástallandieđálašvuođa ossodaga vuosttašamanueansa, Merete Lund Fasting, lea dutkan olu jagiid mánáid olgunastinfáttás. Son lohká ahte leat vuorjašuhtti dieđut mat bohtet ovdan iskkadeamis.
Son lohká ahte váhnemat fertejit eambbo ovddasvástádusa váldit dakko bokte ahte mánát fas álget eambbo leat olgun. Son lohká ahte mánát eai soaitte fáhkka beare ieža fas álgit leat eanet olgun go maid dál dahket, ja dasa dárbbahuvvojit váhnemat leat mielde vai movttiidahttet mánáid olgun leat eambbo.
