Sámediggi vuolláičállá ovttasbargošiehtadusa vuođđooahpu váhnenlávdegottiin ja mánáidgárddi váhnenlávdegottiin.
Sámediggeráđđi Mikkel Eskil Mikkelsen vuolláičálii geassemánu 9. beaivvi ovttasbargošiehtadusaid mánáidgárddi váhnenlávdegottiin (FUB) ja vuođđooahpu váhnenlávdegottiin (FUG). Ovttasbargguin nannejit sámi mánáid ja nuoraid rievtti oadjebas ja buriid birrasiid mas lea vuolggasadji sámi gielas ja kultuvrras.
– FUB ja FUG leat iešheanalaš orgánat Máhttodepartemeantta áššiin mat gusket ruovttu ja mánáidgárddi/skuvlla ovttasbargui, ja leat dehálaš ovttasbargoguoimmit Sámediggái. Sii ovddastit váhnemiid beroštumi mánáidgárde- ja skuvlasuorggis, okta dehálaš jietna man mii háliidit guldalit min ovttasbarggus surggiin, lohká sámediggeráđđi Mikkel Eskil Mikkelsen.
Vuoigatvuohta oahpahussii
Ovttasbargošiehtadusas leat soabadan ahte buot mánáin ja nuorain galgá leat oadjebas, buorre ja dorvvolaš skuvlabiras, galget dovdat iežaset dohkkehuvvon dakkárin go sii leat ja ahte mánáin ja nuorain lea vuoigatvuohta oahpahussii sámegillii ja sámegielas. Maiddái dahkat FUG ja Sámedikki oinnolaš aktevran ja doarjjan sámi skuvlasuorggis.
– Sámedikkis leamašan ovttasbargu FUB/FUG:in jo 2010 rájes, ja mii leat ilus go min ovttasbargu formaliserejuvvo dáinna vuolláičállimiin. Sámediggi nammada daidda lávdegoddiide sámi áirasiid. Áigodaga 2020–2023 leaba Thomas Ole Andersen mánáidgárddi váhnenlávdegottis (FUB) ja Sara Marja Magga vuođđooahpahusa váhnenlávdegottis (FUG), lohká Mikkelsen.
