-Almmuhus-
OĐĐASATManaiga politiijaid «gillárii»

Manaiga politiijaid «gillárii»

-

-

Guokte nissona manaiga njuolga politiijaid «gillárii». Amfetamiidna man árvu lea birrasii 100 000 ruvdno ii ollen de goasse dohko gosa lei jurddašuvvon.

Cuoŋománu 20. beaivvi vieččaiga guokte birrasii 20-jahkásaš nissona páhka muhtu poastakássas Unjárggas. Dan maid soai eaba diehtán lei ahte politiijat čuvvo mielde páhka vánddardeami. Dan čállá iFinnmark.

Duollárat bissehedje Gardermoenis páhkka mii lei sáddejuvvon olgoriikas Norgii. Čájehuvvui ahte páhka siste lei 115 grámma amfetamiidna. Dan válde duollárat ja bidje sadjái pulvariid. Dasto čuovvugohte politiijat páhka vánddardeami.

Čuoččuheaba vigiheapmin

Nissonguoktá leaba biddjon guovtti vahkkui háldogiddagassii ja goappešagat čuoččuheaba iežaska vigiheapmin.

Nieiddaguoktá bealušteaddjit Edel Hennie Olsen og Vidar Zahl Arntzen, eaba hálit kommenteret ášši. iFinnmark dieđuid mielde boahtá giddagasdokumeanttain ovdan ahte páhkka lei sáddejuvvon nuppi nieidda áhččái. 

iFinnmark dieđuid mielde leaba áhčči ja nieida čilget guovtteládje politiijaide. Nieidda lea čilgen ahte soai áhčiin leaba birrasii jagi juogadan poastakássa ja son láve moatte geardde vahkkus viežžat poasta áhčis ovddas. Áhčči gii orro poastakássa lahkosis biehttala iežas juogadan poastakássa nieiddainis.

Politiijat eai muital namuhuvvon aviisii makkár stáhtus áhčis lea áššis, eai ge muital várohit go politiijat eambbosiid seahkanan dán áššái.

-Almmuhus-