-Almmuhus-
-Almmuhus-
-Almmuhus-
OĐĐASATMánáidtevnnet-čájáhus Guovdageainnus

Mánáidtevnnet-čájáhus Guovdageainnus

-

-

Sámi álbmotbeaivvi rahppo govvačájálmas Guovdageainnu gilišiljus. Govaid leat Guovdageainnu mánát tevdnen, 50-logus.

Sámi álbmotbeaivvi rahppo govvačájáhus Guovdageainnu gilišiljus. RiddoDuottarMuseat-Guovdageainnu gilišillju ja Guovdageainnu historjásearvi leat ovttas ráhkadan čájáhusa «Mánáidtevnnegat 1951-1955». Dan dieđihit preassadieđáhusas.

Čájáhusas oainnát mánáidtevnnegiid maid Guovdageainnu mánát tevdnejedje 1951 rájes gitta 1955 rádjái, ja muhtun govaid govviduvvon Guovdageainnus seamma áigodagas.

Rahpan lea Sámi álbmotbeaivvi. Rahpama oktavuođas logaldallá Johan Klemet Kalstad «Guovdageaidnu 50-logus – áigeearru». Čájálmas bistá gitta njukčamánu gaskkamuddui.

 

Vuolleriikka bárra čohkken govaid

Lei Vuolleriikka bárra Enno ja Elisabeth Brokke geat leaba vurkkodan tevnnegiid ja govven. Tevnnet- ja govvačoakkáldat lea digitaliserejuvvon ja maid čájehuvvo TV-šearpmas čájáhusas.

Čájáhusas oainnát lassin Guovdageainnu skuvlla 5A-luohkálaččaid tevnnegiid, tevdnejuvvon dán jagi.

Mánáidtevnnegiid bokte oahpásmuvat dološ ja dálá mánáid árgabeaivvi eallimii Guovdageainnus. Guovttis daid smávva dáiddáriin 1950-logus leigga Jan Henry Keskitalo ja Nils Mathis Eira.

 

Oahpaheaddjit

Brokke náittosbárra ásaiga Guovdageainnus 1951:s gitta 1955 rádjái. Soai searvvaiga báikki olbmuid eallimii, ja Enno čuovui muhtin bearraša giđđajohtima.

Brokkeguovttos oahpaheigga gili mánáid tevdnet, pianoin ja njurggonasain čuojahit.

2001:s fidnii Guovdageainnu gilišillju daid vuosttaš tevnnegiid Brokkeguoktás, ja 2012:s musea oaččui daid tevnnegiid mat sudnos ain ledje rádjosis.

Musea čoakkáldagas leat dál oktiibuot 225 Guovdageainnu mánáidtevnnega.

Čájáhus oktan logaldallamiin lea RiddoDuottarMuseat-Guovdageainnu gilišillju ja Guovdageainnu historjásearvvi ávvučájáhus Tråante 2017 oktavuođas.

-Almmuhus-