-Almmuhus-
OĐĐASATMánáid­gárde­bargi lea biddjon háldo­gidda­gassii

Mánáid­gárde­bargi lea biddjon háldo­gidda­gassii

-

-

Finnmárkku politiijat leat bidjan háldogiddagassii mánáidgárdebargi gean várohit bargan seksuálalaš daguid mánáiguin.

Finnmárkku politiijaguovlu oaččui lávvordaga 26.10.19 diibmu 14.30 fuolahusdieđu dievddu birra gii bargá muhtun mánáidgárddis Nuorta-Finnmárkkus. Dán dieđihit politiijat preassadieđáhusas.

Politiijat álggahedje dalán ášši ja dutkagohte.

Válde giddagassii

Sotnabeaieahket válde politiijat dievddu giddagassii go várohit ahte lea rihkkon ráŋggáštuslága ja seksuálalaš daguid dahkan mánáid vuostá.

– Jorret ságat

Finnmárkku politiijaguovllu operašuvdnajođiheaddji Ann Rigmor Søderholm lohká ahte sii leat aiddo dutkagoahtán ášši:

– Mii diehtit ahte jorret olu ságat ášši birra gielddas gos dát lea dáhpáhuvvan, ja dan dihte leat mii mearridan sáddet dán preassadieđáhusa ja ávžžuhit olbmuid ahte eai juoge guorosságaid ášši birra.

Søderholm muitala ahte sii dutket ášši viidát, ja dutkama geažil eai atte dál eahkes eambbo dieđuid ášši birra.

Eambbo mánát

Politiija Torstein Pettersen, gii jođiha Oktasaš ovttadaga taktihkalaš guorahallama Finnmárkku politiijaguovllus, muitala iFinnmarkii ahte sii várohit albmá bargan seksuálalaš daguid eambbo mánáide go oktii. 

– Suohkan vuostái válddii vuorjašumi muhtin mánáidgárddis bargi birra gii sáhttá bargan seksuálalaš daguid mánáid vuostá, dadjá Pettersen iFinnmark:i. 

Dutket ášši

Pettersen muitala viidásit ahte sii dál dutket ášši ja ráhkadit gova leat go dahkkon makkár ge vearredagut áššis, ja man viidát rihkusáššit leat dahkkon. 

– Vahkkoloahpas mii gažadeimmet sihke bargiid ja váhnemiid geat leat gullevaččat dan mánáidgárdái, ja dainna bargguin mii joatkit dán vahkku. Mii maid čađahit heivehuvvon gažademiid mánáidgárddi mánáin, sávvamis dán vahkku, dadjá Pettersen NRK Sápmái.

Roy Arthur Olsen

-Almmuhus-