-Almmuhus-
-Almmuhus-
-Almmuhus-
MAGASIIDNAMánáide oahpahit movt gulahallat riekta neahtas

Mánáide oahpahit movt gulahallat riekta neahtas

-

-

Váhnemiin leat máŋga beali maid ferte čuovvut mielde go mánás lea mobiltelefuvdna. Guovtti máná eadni, Ellen Cecilie Scheen, gii bargá Telias, juogada iežas buoremus ráđiid eará váhnemiiguin.

Sullii 97 proseantta gaskal ovcce- ja 16-jahkásaš mánáin besset geavahit mobiltelefuvnna, muitalit Mediabearráigeahču guorahallanbohtosat mánáid ja nuoraid mediadábiid birra.

 

Mánát ohppet jođánit

Go mobiilla sáhttá nu máŋgga ládje geavahit, de ii leat nu álki váhnemiidda čuovvut mielde geavaheamis.

– Mii lávet dadjat ahte telefuvdna lea dego lummaniibi mas leat ollu neavvut,  nu go telefuvnnas, mas leat eanet vejolašvuođat go dušše riŋget ja sáddet dieđuid. Dan dihte lea dárbu hupmat mánáiguin maid sii ožžot lobi bargat mobiltelefuvnnas, vaikko makkár agis mánát leat, lohká Ellen Cecilie Scheen Telias preassadieđáhusas.

– Ii ábut leat nu buori jáhkus ahte dušše geiget telefuvnna mánnái ja jáhkkit ahte sii eai máhte ieža viežžat dieđuid telefuvdnii. Mánát ja nuorat leat jođánat teknologiija oahppat, ja olbmát maid oahpahit earáide, lohká Scheen ja rávve váhnemiid vuđolaččat hupmat mánáiguin, sihke ovdal ja maŋŋel, vai váhnemat dihtet makkár rájiid sii bidjet.

 

Boasttuipmárdusat

Lea ollu mii ii boađe ovdan čállosiin, ja buot máilmmi «emojiit» eai álo sáhte boasttuipmárdusaid njulget.

– Mánát eai álo jurddaš movt nubbi olmmoš reagere dasa maid sii čállet, de fertet mii veahkehit sin vai ohppet makkár váikkuhus sáhttá leat das maid sii čállet, rávve Scheen.

Rumašgiella, ironiija, geažuheapmi, humora, leat ovdamearkkat movt čálus sáhttá ipmirduvvot goabbat ládje, sihke sus gii sádde ja son gii lohká dan dieđu.

-Almmuhus-