Smávva campingvovnnain mátkkošta mánáidáittardeaddji, Anne Lindboe, Finnmárkkus dán vahkkus. Son dáhtu skuvlaohppiiguin deaivvadit vai mánát ja nuorat ohppet iežaset rivttiid birra.
Smávva campingvovnnain mátkkošta mánáidáittardeaddji, Anne Lindboe, Finnmárkkus dán vahkkus. Son dáhtu skuvlaohppiiguin deaivvadit vai mánát ja nuorat ohppet iežaset rivttiid birra.
Ovdal go Anne Lindboe šattai Norgga mánáidáittardeaddjin, de jearahalle muhtin nuorat su. Sii háliidedje diehtit makkár áigumušat Annes ledje jus oččošii ođđa ámmáha mánáidáittardeaddjin, dasa lassin ávžžuhedje su oahpásmuvvat ja deaivvadit mánáiguin ja nuoraiguin geat dárbbašit eanet gelbbolašvuođa iežaset rivttiid birra.
– Mánát ja nuorat dihtet beare unnán iežaset vuoigatvuođaid birra, čilge mánáidáittardeaddji Anne Lindboe preassadieđáhusas.
«Barneombussen»
Norgga mánáidáittardeaddji galgá fuolahit ahte mánáid ja nuoraid oaivilat gullojit, ja ahte sin vuoigatvuođat doahttaluvvojit. Go mánáidáittardeaddji háliida mánáid ja nuoraid miehtá Norgga oahpahit eanet iežaset rivttiid birra, de fuomášedje mátkkoštit smávva campingvovnnain man gohčodit «Barneombussen». Mátkkoštanprošeakta lea oassin Norgga vuođđolága 200 jagi ávvudeamis. Dán vahkkus galledit Finnmárkku, odne leat jo deaivvadan skuvlaohppiiguin Álttás.
– Mun illudan deaivvadit Finnmárkku skuvlaohppiiguin ja digaštallat singuin makkár vuoigatvuođain lea mearkkašupmi sin árgabeaivái, lohká Lindboe.
Jus rievttit rihkkojuvvojit
Mánáidáittardeaddji bargu lea maiddái fuolahit ahte eiseválddit čuvvot mánáidkonvenšuvnna. Go dál galledit skuvllaid, de oahpaha mánáidáittardeaddji mánáidkonvenšuvnna birra. Mánáidkonvenšuvdna lea oassin Norgga lágas ja čilge makkár vuoigatvuođat mánáin ja nuorain leat ruovttus, skuvllas ja servodagas.
– Mánát ja nuorat galget oahppat ahte sii sáhttet ieža dahje muhtin ollesolbmo vehkiin váldit oktavuođa skuvlla rektoriin, dearvvašvuođadivššárin, mánáidsuodjalusain dahje gieldda jođihangottiin jus sin vuoigatvuođat rihkkojuvvojit, muitala Lindboe.
