Dál sáhttet maiddái mánát oažžut vástádusa dasa guđiin stuoradiggebellodagain sii leat eanemus ovttaoaivilis.
Dán čavčča stuoradiggeválggaid oktavuođas lea Redd Barna ovttas ođasdoaimmahagain NTB:in ráhkadan «valgomat» mánáid várás.
– Sáhttá leat váttis sihke rávisolbmuide ja mánáide ipmirdit maid politihkkarat rievtti mielde oaivvildit iešguđetge áššiid birra. Mánáid «valgomáhtas» leat gažaldagat fáttáid ja áššiid birra main mánát ja nuorat beroštit, ja dat galget gávdnat vástádusaid daidda politihkalaš áššiide mat leat dehálaččat sin árgabeaivvis ja bajásšaddamis, čilge Redd Barna generálačálli Birgitte Lange preassadieđáhusas.
Lea neahttafálaldat mii doaibma dainna lágiin ahte mánát vástidit maid sii oaivvildit iešguđetlágán politihkalaš áššiid ja čuoččuhusaid birra.
– «Valgomáhtas» leat feara makkár čuoččuhusat ja ákkastallamat ja mánát besset de árvvoštallat man muddui sii leat ovttaoaivilis čuoččuhusaiguin, čilge Lange.
Go mánát leat čađahan «valgomáhta», de besset diehtit guđiin bellodagain sii leat eanemus ovttaoaivilis ja guđiid eará bellodagaiguin sii leat oalle ovttaoaivilis.
Dat lea oaivvilduvvon 5.-10. luohká mánáide ja almmuhuvvo dárogillii, ođđadárogillii, lullisámegillii, davvisámegillii ja julevsámegillii. Dan gávdná barnasvalg.reddbarna.no neahttasiiddus.
