-Almmuhus-
-Almmuhus-
Beassážat 2022Mánáid juoigan­konsearta: – Spagga­dievva ja beassážiid šárbma­konsearta

Mánáid juoigan­konsearta: – Spagga­dievva ja beassážiid šárbma­konsearta

-

-

Davvi Division lágidii mánáid juoigankonseartta beassážiid ja dan seammás ledje sis olgodoaimmat earret eará Elin Oskaliin. Nu sii čohkkejedje ollu mánáid ja váhnemiid juoigankonsertii mii álggii olgodoaimmaid maŋŋel. 

Sadji sullii 100 olbmui ja vel veaháš lassin, de lei gárži sajiid ektui mánáid juoigankonsearttas dáid beassážiid. Birrasii 130 olbmo ledje čoahkkanan geahččat sihke smávva ja vel smávit mánáid go čájehit ahte luohti eallá Guovdageainnus. Ja dat lei vedjemeahttun nu ahte ii šarmerejuvvon unnoraččain. 

Čeahpes váhnemat

Okta nubbi lávkii lávdái ja dohppii mikrofovnna ja juoiggastii. Eai buohkat lean nu hárjánan mikrofovdnii ja gullat iežaset jiena, earát fas juige olles čoddagiin dego hárjánan juoigit. Muhtimat soite gáhtat go čuoččohedje ollu olbmuid ovddabeallái, muhto buorre bagadallan váhnemiin dagahii ahte eatnasat birgehalle bures iežaset vuosttaš vásáhusain lávddi nalde. Geahččit maid doško gieđaid duhtavaččat. 

Anthony Hætta láidestii konseartta Davvi Divisionis ja lei hirbmat duhtavaš. 

– Dan mun gal lean. Go nu ollu olbmot leat boahtán sihke olgodoaimmaide ja maid serve konsertii lea hirbmat somá ja čájeha ahte lea dárbu dakkár lágidemiide mat leat heivehuvvon nuoramusaide beassážiid áiggi maid. 

23 máná oasálaste ja juige. Muhtimiidda lei dat lunddoleabbo go earáide. 

Luohti čižžemilkkiin

Máze jumešguovttos Siljá-Máren ja Jon-Máhtte (fargga 4-jahkásaččat) leaba sin searvvis. Sudno áhčči lea dovddus juoigi Johan Ivvár Gaup, ja eadni Linn-Henriette Bæhr Gaup lea maid juoigan almmolaččat. 

ÁHČČI JA MÁNÁT: Áhčči Johan Ivvár Gaup lea dovddus juoigi ja dál lávkiiga su jumežat, Silja Maren ja Jon Máhtte, maid lávddi nala. Govva: Johan Mathis Gaup
ÁHČČI JA MÁNÁT: Áhčči Johan Ivvár Gaup lea dovddus juoigi ja dál lávkiiga su jumežat, Silja Maren ja Jon Máhtte, maid lávddi nala. Govva: Johan Mathis Gaup

– Juo, soai dáidiba gullan luođi dan rájes go riegádeigga, ja dál lei sudnos maid hállu geahččalit, nu ahte beasaiga, mojohallá Johan Ivvár. 

Son ii loga áigut bágget mánáid juoigat almmolaččat jus dan eaba hálit. 

– Dan gal galgaba ieža beassat mearridit go rávismuvvaba. Mu mánáin lea hállu juoigat ja dat gal mu mielas lea buorre, ja mun gal diehttelasat áiggun veahkehit sudno doalahit dán kulturárbbi. Muhto áiggi mielde gal ferteba ieža diehtit máid háliideaba, čilge Gaup beaivvádagas maŋŋel koseartta. 

-Almmuhus-