-Almmuhus-
-Almmuhus-
OĐĐASAT «Mamma Mu» filbma galgá dubbe­juvvot sáme­gielaide

«Mamma Mu» filbma galgá dubbe­juvvot sáme­gielaide

-

-

Sámediggeráđđi juolluda 300 000 ruvnnu doarjaga Internášunála Sámi Filbmainstituhttii (ISFI) Mamma Mu animašuvdnafilmma dubbemii davvi- ja lullisámegillii.

Vuođđun Mamma Mu filbmii leat oahpes, ruoŧŧelaš girjjit earenoamáš gusa Mamma Mu birra, ja animašuvdnafilbma lea jurddašuvvon smávimus mánáide. Ođđa filmmas Mamma Mu birra galgá leat vuosttaščájáhus 2021 ođđajagemánus. Dán čállá Sámediggi preassadieđáhusas. 

Almmuhuvvot oktanaga 

ISFI áigu filmma dubbet davvi- ja lullisámegillii ja vuosttaščájáhus galgá leat oktanaga filmmain originálagillii. ISFI lea gulahallamin Mamma Mu produseanttain oažžun dihte šiehtadusa sadjái mii diktá sámi veršuvnnaid filmmas čájehit buot lávddiin, maiddái streamas.

– Prošeakta addá earenoamáš vejolašvuođa guhkesfilmma almmuhit mánáide sihke davvi- ja lullisámegillii dalle go filbma čájehuvvo kinos. Dat livččii mielde sámegielaid oainnusmahttime ja sámi mánáide addime vejolašvuođa filmma geahččat iežaset gillii stuorra kinosálas, dadjá sámediggeráđđi Henrik Olsen (NSR).

Maiddái TIFF:i

ISFI lea maid gulahallame Tromsø Internasjonale Filmfestivalain (TIFF) dan birra ahte sámi veršuvnnaid filmmas čájehit sin olgokinos 2021 ođđajagemánus.

ISFI direktevrra Anne Lajla Utsi mielas lea deaŧalaš ođđa mánáidfilmmaid ja animašuvnnaid dubbet sámegielaide, ja dán barggu vuoruhit.

– Mii leat hui giitevaččat dán doarjagis, go dat lea mielde váikkuheame dasa ahte min mánát besset geahččat animašuvnnaid iežaset eatnigillii. Leat hui unnán mánáidfilmmat ja prográmmat sámegillii, ja danne lea deaŧalaš dákkár giellabargguid vuoruhit. Dat lokte sámegielaid árvvu, earenoamážit danne go áigut dán animašuvdnafilmma maiddái lullisámegillii dubbet, dadjá Utsi.

ISFI galgá davvisámegiel dubbema Guovdageainnus buvttadit, ja ovttas Bautafilm AB:in lullisámegiel veršuvnna buvttadit Deartnás Ruoŧas.

– Prošeakta lea ovdáneapmin sihke ISFI:i ja Bautafilmii boahttevaš ovttasbarggus filmmaid dubbemis lullisámegillii, dadjá sámediggeráđđi Henrik Olsen.

Juolludeapmi lea addojuvvon Ásahusovddideami ortnegis.

- Advertisement -
-Almmuhus-