Sosiála mediat bohtet ávkin dál go dálvagoahtán lea, go dan bokte gulaskuddet olbmot earret eará siivvuid birra.
Sosiála mediat bohtet ávkin dál go dálvagoahtán lea, go dan bokte gulaskuddet olbmot earret eará siivvuid birra.
Maŋimuš beivviid lea borgan miehtá Finnmárkku, dát dagaha ahte biilavuoddjit geat eai leat lonuhan dálvejuvllaide leat šaddan biilla haga orrut.
Facebook bokte oidnojit olbmot jearaheamen sihke makkárat siivvut leat ja ohcalit sáhtolaččaid ja juvlalonuhanvehkiid.
Darvánan geasseorohahkii
Trine Guttorm lea okta dáin, son lea geasseorohagas Čorvošrođus, Porsáŋggus, gosa mannan ija lea muohttán birrasiid vihtta sentte, ja biillas leat geassejuvllat.
– Dál in beasa in gosage, muhto in galgga bargui nu ahte ii leat áibbas heahti gal, čaibmá Guttorm.
Son lohká eatnašiin sin orohagas leat geassejuvllaid biillain.
– Dat oidnojit ohcaleamen olbmuid geat sáhtašedje fievrát dálvejuvllaid deike, nu ahte dat ordnašuvvá gal varra, čilge son.
Guttorm lohká iežas áigut beaivvi mielde oaidnit suddá go muohta:
– Jus ii sutta de ferten oažžut muhtin vilbeali buktit juvllaid deike.
Dákkár lei Ávvira kantuvrra olggobealde ikte:
Illudat go dálvái? Ná lea Guovdageainnus juste dál Ávvir doaimmahusa olgobealde. Buorre vahkuloahpa!
Posted by Ávvir on 4. October 2015
Olu bargu
Kárášjoga Statoillas muitalit leat olu barggu odne.
– Telefuvdna lea čuodjan iđitbotta. Jáhkán leat birrasiid 30 olbmo jo riŋgen jearrat sáhttit go molsut juvllaid ja ain diŋgojit eambbosat, muitala Hans Mickal Myrskog.
Son lohká iežaset geargat gal molsut juvllaid muhto šaddet bargat guhkit ja sirdit eará diimmuid dego oljomolsunbargguid eará hávvái.
– Dál leat mis juvlamolsumat gitta gaskavahkku rádjai. Vuosttaš muohta orro álot boahtimin nu fáhkka, olbmot eai oba smiehta ge molsut juvllaid ovdal go lea jo muohttán, čaibmá Myrskog.
Makkár lea siivu doppe gos don leat? Juoge gova Instagram bokte ja merkes #avvirmuohta.
Maiddái politiijaloggain oaidná ahte leat heajos siivvut. Mannan vahkkoloahpa leat sihke Oarje- ja Nuorta-Finnmárkkus máŋggat biillat vuodján badjel geainnu ja politiijat ávžžuhit olbmuid vuodjit várrogasat.
Ja siivvut eai dáidde buorránit buoril, Meteorologalaš instituhta Håvard Thorset dieđihii NRK Sápmái ahte Tromssa ja Finnmárkku rittus beassat vásihit borgadálkkiid. Doppe šlahttá ja arvá, muhto maiddái siseatnamis sáhttá muohttit.
Siseatnamis buolašta boahttevaš beivviid, ja boahttevaš ijaid leat idjabuollašat.
