-Almmuhus-
KULTUVRAMáinnas fámu ja fámohisvuođa birra

Máinnas fámu ja fámohisvuođa birra

-

-

Sámi Našunálateáhtera ođđaseamos bihttá lea sáme- ja nissonpolitihkalaš teáhtermáinnas, mii suohtastallamiin ja duohtavuođain lea čállojuvvon historjjálaš dieđuid ja áigeguovdilis dáhpáhusaid vuođul.

Sámi Našunálateáhtera nubbi álgočájálmas dán jagi lea «Nissondeaivvadeapmi» man Sven Henriksen lea čállán.

Ođđajagemánu 25. beaivvi čájehuvvo bihttá vuohččan Guovdageainnu kulturviesus, ovdal go dollejit mátkái čájehit bihtá eará báikkiin Sámis.

 

Ságastallan mii hástuha ja hárdá

Dáhpáhusat ja rollaid áigegaska lea dološ áiggis ja dálá áiggis.

– Lea jahki 1890. Muhtin sámenisu háliidivččii buoret guohtundilálašvuođa iežas bohccuide, ja vuolgá finadit Šloahtas. Doppe deaivvada muhtin hoavvanissoniin ja dronnegiin. Sin ságastallamis hásttuhit ja hárdet guhtet guimmiideaset iežaset iešguđetlágan- ja searvevuođaiguin, álggaha Sámi Našunálateáhter preassadieđáhusa bihtá birra.

 

Golmma nissona birgehallan

Suohtastallamiin, duohtavuođain ja poehtalaš lávddegovahallamiin badjána jearaldat ahte mii lea nuppástuvvon 1890:s dálážii.

– Dan áigásaš sohkabeali-, seahtoservvodaga- ja eamiálbmogiid vealaheapmi dagaha gáržžes ovdánanvejolašvuođa. Mot dát golbma nissona birgehallet, ja mot dat čuohcá sidjiide, leat jearaldagat maid Sámi Našunálateáhter ovddida.

 


Nissondeaivvadeami lávddi lea Mette Brantzeg hábmen ja biktasiid lea Anne Berit Anti hábmen. Govven: Per Heimly
 

 

Debutánttat mielde

Sihke bivttashábmemii ja šuokŋadahkamii lea teáhter viežžan čehpiid olggobealde geat vuohččan doaimmahit barggu teáhtermáilmmis.

– Dán buvttadusas leat guokte teáhterdebutántta mielde, namalassii bivttashábmejeaddji Anne Berit Anti ja šuokŋadahkki Elle Márjá Eira, dieđiha Sámi Našunálateáhter.

Elle Márjá Eira lea ovdal bargan Sámi Našunálateáhteris neavttárin, ja debuterii «Májjá gávppaša» bihtás 2005:s. 

Anne Berit Anti doaimmaha Abanti bivttasfitnodaga, ja lohká ge teáhteris beassat geavahit dan maid lea oahppan dan rájes go skuvlla váccii.

 

Ollugat bihtá duogážis

Teáhterbihtás leat golbma neavttára lávddis; Anja Bongo Bjørnstad, Sarakka Gaup ja Ánne Mággá Wigelius.

Bagadallin lea Mette Brantzeg, gii maiddái lea hábmen bihtá lávddi.

Britt-Inga Vars lea jorgalan bihtá sámegillii, man Sven Henriksen lea čállán.

Anne Berit Anti lea ovttas Gerlinde Thiesseniin duddjon biktasiid dán bihttái, ja čuovggaid lea Bernt Morten Bongo hábmen. 

Buvttadus- ja čájálmasteknihkkarat leat Ole Thomas D. Nilut, Jan Cato D. Nilut, Bernt Roger Somby ja Svein Egil Oskal.

Per Heimly lea govven čájálmasgovaid ja Kerstin Andersson lea hábmen bihtá gráfalaš osiid.

 

-Almmuhus-