-Almmuhus-
-Almmuhus-
KULTUVRAMáilmminásttit Riddu Riđđui

Máilmminásttit Riddu Riđđui

-

-

Riddu Riđđu lea ovttastahttán álgoálbmot­násttiid Buffy Sainte-Marie, Tanya Tagaq ja Maxida Märak. Dát golbma buolvva galget ovttasbargat ja čuojahit oktasaš konseartta man festiválajođiheaddji sávvá geasuhit olu olbmuid. 

Riddu Riđđu almmuhii mannan vahkkus vuosttaš artisttaid geat galget čuojahit festiválas mii lágiduvvo suoidnemánu 10.-14. beivviid Olmmáivákkis, Gáivuona ­suohkanis. 

Festivála lea ovttastahttán golbma buolvva álgoálbmotnásttiid, namalassii Buffy Sainte-Marie, Tanya Tagaq ja Maxida Märak.

Sii galget ovttasbargat ja buvttadit oktasaš konseartta man čuojahit Riddu Riđu váldolávddis. 

– Mis leamaš áigumuššan máŋga jagi ovttastahttit dán golbma álgoálbmotdronnega. Go sii čuojahit ovttas, de jáhkkit olbmuid dovdat sihke aktivismma, proteastta ja gižžomiela. Mun doaivvun dá šaddá dakkár konsearta man olbmot eai háliit manahit, dadjá Riddu Riđu festiválahoavda Sandra Márjá West preassadieđáhusas. 

 

Servodatáŋgiruššan

Buffy Sainte-Marie, Tanya Tagaq ja Maxida Märak áŋgiruššet servodatáššiin ja dat speadjalastojuvvo maiddái sin musihkas.

Eai sii dohkket vuoigatmeahttunvuođa ja sidjiide lea dehálaš ovddidit álgoálbmotáššiid. 

Kanadalaš Buffy Sainte-Marie lea bargan musihkain badjel 60 jagi.

Su leat gudnejahttán, ja ­dovddus artisttat nu go Janis ­Joplin ja Elvis Presly leaba čuojahan su lávlagiid. Son berošta álgoálbmotrivttiin, birasgáhttemis ja pasi­fism­mas.

Son lea vásihan ahte su musihkka maiddái hilgojuvvo ­proteastalávlagiid geažil.

– Buffy Sainte-Marie lea ­legean­da ja sus leamaš stuora mearkkašupmi Riddu Riđđui. Su doarjaga haga ii livčče Riddu Riđđu šaddan máilmmi dovddus álgoálbmotlávdin. Buffy čuojahii Riddu Riđus 2009:s ja 2013:s, ja sus leamaš hállu máhccat deike. Dá šaddá vuosttaš diŋgojuvvon konsearta man ráhkada ovttas sámi artisttain, lohká West. 

 


Riddu Riđu festiválahoavda Sandra Márjá West. Preassagovva

Gudnejahtton čottalávlu 

Inuihtta Tanya Tagaq lea gudnejahttojuvvon čottalávlu gii seaguha ođđaáiggi ja árbevirolaš mu­sihka.

Son lea dovddus čuojahit garralágan konsearttain ja su váibmoáššin leat Kanada álbmo­álbmogiid vuoigatvuođat ja árbevierut.  

– Tanya čuojahii Riddu Riđus logi jagi áigi ja sutnje liikojedje geahččit. Tanya lea hirbmat kula ja su sáttasánit leat čielgasat. Konsearta bokte ávvudit ahte álgoálbmogiin ain lea vuoibmi ceavzit ja birgehallat vuostálastimiin, dadjá festiválahoavda. 

 

Duostil

Johkamohkkilaš Maxida Märak lea soahpatmeahttun proteasta-juoigi ja son dáistala ruvkedoaimmaid vuostá Sámis.

Su lávllateavsttain leat čielga politihkalaš cealkámušat. Maxida Märak ­bargá eanemusat hiphop musihkain ja seaguha dasa luođi. 

– Maxidas lea erenomáš jietna ja son lea čeahpes juoigi. Seammás ii bala mastege ja muitala duohtavuođa máilbmái, lohká Riddu Riđu festiválahoavda ­Sandra Márjá West. 

Artisttaid oktasaš konsearta čalmmustahttá álgoálbmogiid oktasaš gičču. 

– Dát diŋgojuvvon bargu máinnaša golbma buolvva vásáhusaid álbmoálbmogiid oktasaš rahčamušas ceavzit ja oažžut dohkkehuvvot min historjjá. Sii geat bohtet konsertii dáidet oažžut áibbas erenomáš vásáhusa man eai goassege vajálduhte, dadjá West. 

 

Dán jagi juovlaskeaŋka

Riddu Riđđu ii dáhkit dušše erenomáš konseartavásáhusa ­festiválas, muhto sii addet maiddái erenomáš juovlafálaldaga ­olbmuide.

Bearjadaga bidje 100 festiválabileahta vuovdemassii vuoliduvvon haddái. 

– Hálbbiduvvon bileahtat ja buorre konsearta lea min juovlaskeaŋka Riddu Riđu festi­válagussiide, loahpaha West preassadieđáhusas.

-Almmuhus-