-Almmuhus-
KULTUVRAMáilmmi gievrramus nieiddaš boahtá Guovdgeidnui 

Máilmmi gievrramus nieiddaš boahtá Guovdgeidnui 

-

-

Bearjadaga golggotmánu 5. beaivvi lohpida Sámi Nášunálateáhter albma ge leahtu, go sámegielat Pippi Nállesuohkku ihtá vuosttaš geardde lávdái Guovdageainnu kulturviesus.

Teáhter čájehuvvo golmma geardde Guovdageainnus ovdal go vulget mátkkoštit, ja sii vánddardit viidát teáhterbihtáin.

Bihttá čájehuvvo earret eará Kárášjogas, Ohcejogas, Vuohčus, Gárasávvonis, Álttás ja Romssas. 

Sihke ábegáhttu, heasta ja villa ja golleruđat leat  Pippis mielde, dieđiha Sámi Našunálateáhter Beaivváš preassadieđáhusas. 

 

Vuosttaš geardde bagadallame

Elle Sofe Sara lea čájálmasa baga­dalli, son leage ámmát­dánse­jeaddji ja lea bargan koreográfan máŋggaid dánsen-  ja teáhter­čájál­masain ovdal.

Son ii leat goassege ovdal bagadallan teáhterbihtá.

 – Oba somá. Mun han lean guhká juo diehtán ahte galggan teáhtera bagadallat vuosttaš geardde, ja lean illudan dasa.
Go mii de álggiimet de mun ges šadden veahá balus, jurddašin «mo dát ges galgá mannat, Elle, maid don dál leat vuohon fuobmán», dadjá Sara.

Sara muitala maid ahte go oanehaš lea dál bargan, de son dovdá ahte máhttá barggu ja ovttasbargu neavttáriiguin manná bures. Son lohká iežas hui duđavažžan. 

 

Čállosa heivehit lávdái

Elle Sofe lea ovdal leamaš bagadallanveahkkin ja leage beassan vásihit mo giehtačállosa heivehit lávdái.

– Mun jurddašin olu daid scenaid birra, ahte mo daid galggan čoavdit, muhto dál dovddan ahte manná hui bures čoavdit daid scenaid.
Lea vissa álo nu ahte lea mihá buoret álgit, ja oaidnit fysihkalaččat mo lea.
Dalle oažžu ideaid ja jurdagiid mo ovtta scena sáhttá dahkat, dadjá Elle Sofe go muitala mii su mielas lei stuorimus hástalus bagadallan­barggus.

 

Hástalus ii váivahuhte šat

Buvttadus álggahuvvui borge­mánus, ja dat mii orui šaddamin Elle Sofe stuorimus hástalussan ii leat šat váivahuvvama veara, muhto baicca illun jorrán.

– Hui somá oaidnit mo dat mii álggos dušše čuožžu báhpiris, ealáska ja šaddá juoga hui miellagiddevažžan. Dego dakkár mánná gii stuorrula. Leat maid dieđusge olu somás fearánat hárjehallamiin. Somás ja ártegis dáhpáhusat maiguin mii reaškit issorasat. Dat lea maid somá dáinna bargguin, dadjá Sara mojohaladettiin.

Nu go Elle Sofes, de lea maiddái sus guhte neaktá Pippi, Marte Fjellheim Sarres, dánsejeaddje­duogáš ja dan galget geahččit beassat fuomášit dakkaviđe go máilmmi gievrramus nieiddaš boahtá lávdái.

– Mun dieđusge liikon hui olu lihkadeami, ja dán bihtás gal neavttárat besset lihkadit olu, dadjá Elle Sofe loahpas.

-Almmuhus-