Ievttá stuimmit Washingtonis leat hirpmáhuhttán olles máilmmi ja politihkalaš njunnosaš láitet demokratiija falleheami.
Amerihkás leamaš demokratiija masá guhkimusat buot máilmmi riikkain, ja danin bohciidit ge garra reakšuvnnat maŋŋel go demonstránttat storbmejedje kongreassaviesu gaskavahku.
– Demokratiijafalleheapmi man dál oaidnit USA:s lea dohkketmeahttun, ja presideanta Trump lea ovddasvástideaddji bissehit dan. Lea suorggahahtti ja jáhkkemeahttun oaidnit mii dáhpáhuvvá, čálii Norgga stádaministtar Erna Solberg Twitteris.
Ikte galggai kongreassa dohkkehit Joe Bidena válgavuoittu, muhto olbmot geat dorjot dálá presideanta manne veagal kongreassavistái. Stuimmiid olis leat unnimusat njeallje olbmo jápmán.
Vuorjašuvvet
Dálá presideantta Donald Trump ii dáhto dohkkehit ahte vuoittáhalai ja dadjá ahte válgabohtosiiguin leat verrošan.
– Hirpmahuvan go oainnán mii geavvá Washingtonas. Dál fertejit dohkkehit demokráhtalaš válggaid bohtosiid, celkkii Nato váldočálli Jens Stoltenberg Twitteris.
Maiddái politihkalaš njunnošat Eurohpás leat vuorjašuvvan.
– USA dáhtošii demokratiija buot máilmmi riikkaide ja danin lea dehálaš ahte politihkalaš molsašupmi dáhpáhuvvá ráfálaččat, čállá ges Stuorabritánnia stádaministtar Boris Johnson.
– Mun jáhkán ahte amerihkálaš demokratiija lea nanus, ja ahte ođđa presideanta, Joe Biden, fas čohkke álbmoga, čállá Spánia stádaministtar Pedro Sánchez.
(©NTB)
