Máhttoministtar Torbjørn Røe Isaksen lea suorganan maŋŋel go 7-jahkásaš gándda nuolahedje ja dolle vulosoivviid astoáiggefálaldagas Álttás.
Máhttoministtar Torbjørn Røe Isaksen lea suorganan maŋŋel go 7-jahkásaš gándda nuolahedje ja dolle vulosoivviid astoáiggefálaldagas Álttás.
7-jahkásaš gánda bieguhuvvui roavvát go lei astoáiggefálaldagas maŋŋel skuvlla maŋŋebárgga.
Stuorát gánddat, geat eai gula astoáiggefálaldahkii nalle sus buvssaid ja sisbuvssaid ovdal dollejedje su vulosoivviid.
Gándda áhčči lea maiddái mediaide muitalan ahte mánná geđgejuvvui.
Hirpmáhuhttá ministara
Buot riikkamediat leat čállán dáhpáhusa mii deaividii Gakori skuvlašilljus Álttás.
Norgga máhttoministtar Torbjørn Røe Isaksen lea suorganan.
– Mun jáhkkán dáhpáhus čuohcá buot olbmuide, leš dal váhnen dahje ii. Go dákkár dáhpáhusat deaividit, de galgá alarmeret ja muitalit dáhpáhusa birra buohkaide geasa guoská, lohká stáhtaráđđi TV2:i.
Soitet dárbbašit veahki
Máhtoministtar dadjá ahte buot mánát galget oadjebasa go leat skuvla astoáiggefálaldagas.
Son oaivvilda ahte Álttá suohkana veahkkeapparáhta ferte bargat áššiin.
– Sihke mánná gii givssiduvvui ja mánát geat givssidedje soitet dárbbašit veahki, lohká máhttoministtar Torbjørn Røe Isaksen.
Ášši dieđihuvvo politiijaide ja mánáidsuodjalussii
Ikte čoahkkinaste skuvlanjunnošat, bargit ja váhnemat.
Álttá gielddahoavda muitala ahte ášši dieđihuvvo sihke politiijaide ja mánáidsuodjalussii.
– Mii leat dieđihan ášši politiijaide, ja dieđihit maid gánddaid mánáidsuodjalussii, lohká gielddahoavda Mads Stian Hansen Altapostenii.
Lossa ášši
Sihke gielddahoavda Mads Stian Hansen ja Álttá sátnejođiheaddji Monica Nielsen váldiba ášši duođalaččat ja lossadit.
– Lea hirbmat duođalaš ášši. Bealit leat mánát, ja mii fertet sis váldit vára. Mii nagodit dál govahallat mii lea dáhpáhuvvan, ja dan vuođul leat dieđihan ášši politiijaide, dadjá Nielsen Altaposten aviisii.
