Ráđđehus ráhkada bargguid boahtteáigái dakko ahte vuoruha oahpu, dutkama ja innovašuvnna. Jagi 2017 stáhtabušeahtas evttoha ráđđehus earret eará nannet árra árjabidjama vuođđoskuvllas, ja nannet juolludemiid dutkamii, oahpaheaddjeohppui, fágaskuvllaide ja fidnofágaide.
Ráđđehus ráhkada bargguid boahtteáigái dakko ahte vuoruha oahpu, dutkama ja innovašuvnna. Jagi 2017 stáhtabušeahtas evttoha ráđđehus earret eará nannet árra árjabidjama vuođđoskuvllas, ja nannet juolludemiid dutkamii, oahpaheaddjeohppui, fágaskuvllaide ja fidnofágaide.
– Jus mii galgat lihkostuvvat Norgga ekonomiija nuppástuhttimiin, de fertejit mis leat mánáidgárddit gos mánát ožžot buori eallinálggu, skuvla gos oahppit ohppet ain eambbo, ja oahppo- ja dutkansuorgi máilmmidásis, dadjá máhttoministtar Torbjørn Røe Isaksen preassadieđáhusas man departemeanta lea almmuhan.
Vuoruha árra árjabidjama ja reálafága
Ráđđehus evttoha geavahit 360 miljovnna ruvnno nannet árra árjabidjanbarggu vuođđoskuvllas skuvlajagis 2017-18.
– Olu oahppit Norgga skuvllas eai oahpa doarvái. Sii bázahallet juo daid vuosttaš jagiin skuvllas. Sii eai nákce joksat fas daid earáid, ja liigeresurssat biddjojit doibmii menddo maŋŋit. Sidjiide šaddá váttisin čađahit joatkkaoahpahusa. Dan dihte fertet árrat bargat dan ala ahte fuomášit sin geat rahčet, dadjá Røe Isaksen.
Ráđđehus evttoha maid nannet reálafága barggu vuođđoskuvllas 30 miljovnna ruvnnuin 2017:s nu ahte eanet oahppit galget oahppat vuođđomatematihka ja -luonddufága. Ruhta galgá earret eará geavahuvvot reálafágasuohkaniid ásaheapmái. Dán rádjái leat ásahuvvon 45 reálafágasuohkana miehtá riikka mat barget systemáhtalaččat matematihkain, luonddufágain ja teknologiijain dan rájes juo go mánát álget mánáidgárdái, gitta dassá go gerget joatkkaskuvllas.
252 miljovnna ođđa oahpaheaddjeohppui
2017 stáhtabušeahtas evttoha ráđđehus geavahit 252 miljovnna ruvnno álggahit ođđa viđajagi oahpaheaddjeoahpu.
– Skuvla galgá addit oahpu boahtteáiggi bargoeallima bargiide. Mii áigut hábmet dakkár skuvlla gos oahppit ohppet eambbo. Dalle dárbbašit oahpaheddjiid geain lea nanu fágalaš máhttu. Mastergrádain lea oahpaheddjiin buoret vuođđu veahkehit ohppiid geavahit iežaset potensiála. Dat maid lokte fitnu ja oahpu árvvu, dadjá máhttoministtar Torbjørn Røe Isaksen .
Ođđa viđajagi oahpaheaddjeoahppu álggahuvvo 2017 čavčča.
Nanne dutkama ja ovdánahttima
Oahppu lea deaŧalaš Norgga gilvalandáidui ja árvoháhkamii bargoeallimis. Dan dihte áigu ráđđehus lasihit juolludemiid dutkama ja alit oahpu guhkesáiggeplána čuovvoleapmái 555 miljovnnain boahtte jagi.
– Nanu áŋgiruššan dutkamis ja ovdánahttimis lea veahkkin midjiide oažžumis gilvonávccalaš bargoeallima, ruonádet bargosajiid ja eanet máilmminjunnosaš fágabirrasiid, dadjá Røe Isaksen.
Jagi 2017 stáhtabušeahttaevttohusas evttoha ráđđehus 3,1 proseantta reálalassáneami dutkamii ja ovdánahttimii. Juolludeamit dahket dalle 1,05 proseantta bruttoálbmotbuvttadusas. Dasa lassin evttoha ráđđehus nannet dan bivnnuhis Skattefunn-ortnega (gullá Ruhtadandepartementii).
Bajida fágaskuvllaid ja fidnofágaid
Ráđđehus fievrreda viidáset fitnofágalaš oahpuid áŋgiruššama, ja evttoha 58 miljovnna ruvnno fágaskuvllaid nannemii ja 30 miljovnna ruvnno fidnofágaoahpaheddjiid gelbbolašvuođa nannemii.
– Norga dárbbaša olu gilvonávccalaš fágabargiid jus galgá lihkostuvvat nuppástuhttimiin. Dan dihte lea leamaš deaŧalaš dán ráđđehussii bajidit ja nannet fitnofágalaš oahpuid. Dáinna áŋgiruššamiin joatkit mii 2017:s, dadjá Røe Isaksen.
Dán čavčča bidjá son ovdan dieđáhusa Stuoradiggái fágaskuvllaid birra ja mainna lágiin dat sáhttet šaddat buorebun ja bivnnuheabbon.
Buoret veagaiduhttin mánáidgárddis
Ráđđehus fievrreda viidáset kvalitehtaáŋgiruššama mánáidgárddis. Dan dihte áigu ráđđehus ásahit norpma dasa galle máná berrejit leat juohke rávisolbmo nammii mánáidgárddis, ja áigu sáddet evttohusa gulaskuddamii giđđat. Dál leat stuora erohusat veagaiduhttima dáfus mánáidgárddiin.
Ráđđehus áigu maid geavahit lagabui 400 miljovnna ruvnno kvalitehta ovdánahttimii mánáidgárddis 2017:s. Dat lea 230 miljovnna ruvnno eanet go 2013:s. Dát lea eambbo go duppalastin njealji jagis. Kvalitehtaáŋgiruššan galgá earret eará geavahuvvot lassiohppui ja gelbbolašvuođaloktemii sidjiide geat juo barget mánáidgárddis.
Buoret studeantaekonomiija
Ráđđehus joatká dainna bargguin ahte oažžut eanet studeantaásodagaid ja buoridit studeanttaid ekonomiija. Dál ožžot studeanttat lohkandoarjaga 10 mánu. Ráđđehus evttoha 2017 giđa ahte ollesáiggestudeanttat galget oažžut 2 600 ruvnno eanet lohkandoarjaga, dalle go ráđđehus bargagoahtá lasihit lohkandoarjaga 11 mánnui. Ráđđehus áigu maid 2017:s addit doarjaga 2 200 studeantaásodahkii.
– Jus mii galgat lihkostuvvat dainna nuppástuhttimiin mii lea vuordimis, de fertet addit oahpu bargiide mii lea máilmmidásis. Sosiála ja ekonomalaš duogáš ii galgga hehttet nuorra olbmuid oažžumis vejolašvuođa váldit oahpu, dadjá máhttoministtar.
