Justiisa- ja gearggusvuođaministtar Monica Mæland dadjá ahte sáhttá ráŋggáštuvvot jos ii čuovo errenáiggi mearrádusaid.
– Jos it daga dan, de sáhttá politiija dás rájes giehtaguššat errenáiggimearrádusaid, nu ahte sáhtát ráŋggáštuvvot sáhkuin ja giddagasain jos rihkut daid. Njoammunsuodjaluslága rihkkun lea duođalaš ja lea danin vuoruhuvvon doaibma politiijain, dadjá Mæland.
Golbma vuoruhanguovllu
VG jearai Mælandas mii lea deháleamos dás ovddos guvlui.
– Min bealis lea deháleamos eastadit njoammuma. Mii eat dieđe geas lea dávda eat ge dieđe geasa njoammu.
– Nubbi lea doalahit servodatkritihkalaš doaimmaid.
– Goalmmát lea ekonomiija. Olusat ballet massimis barggu, dietnasa ja ásodaga.
