Eallindilleiskkadeapmi čájeha ahte norgalaččaid dearvvašvuođaváttut lassánit mađi unnit dinejit. Heajumus dearvvašvuohta lea sis geain lea unnimus ruhta.
Dat boahtá ovdan Statistihkalaš guovddášdoaimmahaga 2017 eallindilledárkkisteamis. Das boahta ovdan ahte sisaboahtu njiedjá seamma ládje go dearvvašvuohtaváttut lassánit, ja sisaboahtu lea erenoamáš vuollin dan unna joavkkužis geat lohket dearvvašvuođa «hui heittogin».
SSB dieđuin boahtá ovdan ahte gaskal guokte ja gávcci proseantta leat sihke geafit ja buhcet. Dat leat gaskal 100 000 ja 450 000 norgalačča.
– Analysas boahtá ovdan ahte lea dakkár joavku geat dieđihit hirbmat heajos ekonomalaš bárttiid. Leat maid ollugat dán joavkkus geat vásihit dearvvašvuođagoluid stuora noađđin, čállet SSB-dutkit čoahkkáigeasus.
Maiddái go dutkit dárkkistedje eará sivaid, nu go oahppodási ja demografiija, de gávnnahedje ahte dearvvašvuohta ja ruhtadilli čuovvu nubbi nuppi. Dat guoská earenoamážit dievdduide geat ásset okto ja dievdduide geain ii leat alla oahppu.
SSB lea maid geahčadan ekonomalaš resurssaid ja vásihuvvon eallindili oktavuođaid. Das boahtá ovdan ahte mađi eanet dine, dađi eanet duhtavaš lea eallimiin. Stuora opmodat ii daga seamma ovdáneami go ruhtadilli.
(©NTB)
