Ihttin lágiduvvo álbmotčoahkkin Deanus Gyrodactylus Salaris leavvanriskka birra Finnmárkku jogain.
Gyrodactylus Salaris lea luossagoddi luhtehas mii lea dagahan ollu váttisvuođaid Norgga čázádagaide.
Luhtehas gohčoduvvo dávjá luossacirbmasteaddjin.
– Gyrodactylus Salaris luossaluhtehas ii leat vel registrerejuvvon Finnmárkku čázádagain. Šaddá hui duođalaš dilli jus luhtehas leavvá Finnmárkku jogaide, dieđihit Finnmárkku fylkkagielddas.
Eastadeaddji doaimmat
Dieđut ja čalmmustahttin dan birra movt eastadit Gyrodactylus Salaris lea hui dehálaš eastadanbarggus.
Danin bovdejit Finnmákku fylkkagielda ja Deanu gielda álbmotčoahkkimii Deanu gieldastivresáles, Deanušalddis, maŋŋebárgga miessemánu 23. beaivvi.
Eanet dieđuid gávnnat Finnmárkku fylkkagieldda neahttabáikkis.
Ovdanbuktá riskaárvvoštallama
Biebmobearráigeahčču buktá ovdan raportta «Árvvoštallan man stuorra várra lea ahte Gyrodactylus Salaris njoammu Ruošša, Suoma ja Ruoŧa rádjeguovlluin Norgga jogaide mat leat Romssas ja Finnmárkkus».
Dasa lassin áigu Deanučázádaga guolástanhálddahus muitalit sin doaimmaid birra eastadit Gyrodactylus Salaris leavvama.
