-Almmuhus-
OĐĐASATLuossaguovddáš dattetge Detnui

Luossaguovddáš dattetge Detnui

-

-

Mannan lávvardaga finai Gurutbellodaga Stuorradikki Energiija- ja biraslávdegotti jođiheaddji Ola Elvestuen Deanus hállamin Luossaguovddáža, Jottu, ásaheami birra. 

– Diimmá stáhtabušehttii lei biddjon ruhta luossaguovddáža ásaheapmái, muhto hálddahusbargit tulkojedje dan moallun, nu ahte das ii šaddan mihkkege, čilge Deanu sátnejođiheaddji, Frank Ingilæ.
 
Elvestuen gulaskuttai luossaguovddáža birra
Son muitala Elvestuen šállošii go Stuorradikki 2015 mearrádus lei nu eahpečielggas.
Ingilæ lohká Elvestuena dál áigut fuolahit ahte luossaguovddážii juolluduvvon ruđaid mielde galgá čilgejuvvot čielgasabbot nu ahte luossaguovddáš šaddá duohtan dán jagi. 
– Mun fitnen Deanu Gurutbellodagain hálešteamen. Háliidin eambbo gullat dan luossaguovddáža birra. Dán jagi juolluduvvo stáhtabušeahtas njealje miljovnna kruvnna luossaguovddáža ásaheapmái. Mun háliidin gulaskuddat mo Deanus leat jurddašan ahte dát guovddáš galggašii doaibmat. Joddu šaddá maid galledanbáikin Deanus, seamma láhkai go álbmotmeahcceguovddážat. Dás sáhttá čájehit makkár árvu luosas lea Deanočázádagas, máilmmi dehálamos luossajohka, mas lea stuorra kulturhistorjjálaš mearkkašupmi, čilge Gurutbellodaga Stuorradikki Energiija- ja biraslávdegotti jođiheaddji Ola Elvestuen Ávvirii.
-Almmuhus-