Eai leat 2015 rájes leamašan nu olu luossadihkit go dán čavčča.
Finnmárkkus eai leat 2015 rájes leamaš nu olu luossadihkit go dál. Mannan vahkku (39. vahkku) leat gávdnan Oarje-Finnmárkkus viđa luossabiepmahagas olu luossadihkiid, eanet go galget luossadihkkemeari ektui.
38. vahkku gávdne álggos guovtti luossabiepmahagas beare olu dihkiid. Vahkku maŋŋel ledje vel golbma biepmahaga main ledje dihkit badjel luossdihkkemeari.
Vearrámus čakčat
Čakča lea vearrámus áigi luossadihkiid dáfus.
– Nu lea dávjá juohke čavčča. Hástaleaddji. Dál leat mii jávkadeame luossadihkiid. Mii atnit dikšunvugiid maidda eat dárbbat geavahit dálkasiid ja maid earálágan vugiid., lohká Norway Royal Salmon (NRS) Finnmárkku direktevra Per Magne Bølgen iLaks neahttabáikái. Duođi eanet son ii áiggo čilget dihkkeváttisvuođaid
NRS:s leat golbma biepmahaga main leat luossadihkit badjeleappos luossadihkkemeari, Cermaq ja Grieg Seafood fitnodagain lea ovtta biepmahagas goappás ge main leat beare olu luossadihkit.
Olu luossadihkit miehtá riikka
Vearrámus dilli orru leamen Ákŋoluovttas, Hámmárfeasttas ja Álttás. Dán guovllu dihkkekoordináhtor, Ragnhild Aukan, dovddasta iLaksii ahte Oarje-Finnmárkkus leat hástalusat dihkkeváttisvuođain.
Muđui Norggas bártidit maid luossadihkiiguin. 39. vahkku ledje 45 luossabiepmahaga main ledje beare olu luossadihkit, badjel luossadihkkemeari, mii lea guokte eanet go vahkku ovdal.
Oktiibuot 21 biepmahaga leat dikšon dálkasiiguin, ja 62 biepmahaga dikšon mekanihkalaččat. 59 biepmahahkii leat bidjan guliid mat borret luossadihkiid, čállá iLaks.
