Sámediggeráđđi ovddida čilgehusa luosa birra Sámedikki dievasčoahkkimii golggotmánus. – Sámediggi áigu dál vuosttaš gearddi digaštallat čilgehusa luossabivddu birra jogain ja mearas, dadjá sámediggeráđđi Silje Karine Muotka (NSR).
– Vaikko luossabivdu lea dušše geassit, de lea leamaš ja lea ain das stuorra mearkkašupmi sámi álbmogii, lohká ráđđelahttu Silje Karine Muotka Sámedikki preassadieđáhusas.
Mearraluossabivdu lea buktán mávssolaš lassitietnasa ja luossabivdu lea don doloža rájes leamaš dehálaš borramuš báikeolbmuide geassit.
– Mii háliidat joatkit árbevirolaš máhtu maid báikeolbmot leat ožžon guhkes áiggi luossahálddašeamis. Sámediggái lea dehálaš oaidnit mo iešguđet áššit mearas, vuonain ja jogain váikkuhit nubbi nubbái. Buot gullet oktii, lohká Muotka.
Olusat eai várra dieđe ahte árbevirolaš luossabivddus leat sierra doahpagat mat gullet lussii, bivdui ja lundui.
– Lea hui rikkis sámegiella mii lea ovdánan luossabivddu geažil ja mii leat hui rápmásat dan dihtii, lohká sámediggeráđđi.
Sámediggepolitihkkariin lea dál vejolašvuohta digaštallat čilgehusa dievasčoahkkimis golggotmánus, 12.–16. beaivvi.
– Mii čuovvulat čilgehusa Sámediggedieđáhusas 2021:s, ja dat fátmmasta eambbo go dát čilgehus, lohká Muotka.
