Dán jagáš stuorimus dáhpáhus Bieskenjárggas lea BeskánLuossaRock festivála mii lágiduvvo lávvordaga. Lágideaddjit vurdet ollu olbmuid joavdat doaluide ja ahte luosat maid leat ollen Beskenjárgii.
Dán jagáš stuorimus dáhpáhus Bieskenjárggas lea BeskánLuossaRock festivála mii lágiduvvo lávvordaga. Lágideaddjit vurdet ollu olbmuid joavdat doaluide ja ahte luosat maid leat ollen Beskenjárgii.
Lágideaddjit jáhkket ollu stuoraluosaid joavdan bajás Deanujoga Kárášjohkii go luonddu bealis lea dulvi bistán, ja luossabivdu Deanučázádagas lea gáržžiduvvon.
– Dušše norggabeale ássit sáhttet searvat gilvui, Deanu čázádaga njuolggadusaid geažil, muitalit lágideaddjit preassadieđáhusas.
Ollu vuoittut
Luossagonagas lea son gii stuorana fitne vuoggageahčái dan guđa diimmus go gilvu bistá. Son sáhttá fasket alla ruhtaárvvu, go vuoitu lea 1000 ruvnno juohke gilo ovddas vuoitoluosas. Nubbin losimus luosa giluárvu lea ges 500 ruvnno, ja goalmmát losimus luosas ges 250 ruvnno.
Dán jagi vuorbáduvvo 5.000,- ruvdnosaš ruhtavuoitu buot luossagilvvohalliid gaskka. Don it dárbbaš luosa fidnet gilvvus, ja lea doarvái ahte dieđihat iežat gilvui.
Bieskenjárgga šaldi bokte lágiduvvo maid sierra gilvu mánáide diibmu 12:s, masa mánát sáhttet nuvttá searvat ja buohkat ožžot vuoittuid.
Ollu iešguđetlágan musihkka
Eahkedis cahkkehit čuovggaid lávddis ja bonjastit allelii jiena. Váldonásti lea Ruoŧa sámi beakkálmas Jon Henrik Fjällgren. Eará artisttat leat Kárášjoga joavku Intrigue, Arvvas duo, suomabeale sámi joavku Ravggon, juoigi guovttos Kárášjohkalaš John Máhtte Utsi ja John André Eira, Mázes eret.
Ávžžuhit ávkkástallat bussefálaldagas
– Konsertii lea nuvttá bussesáhtu olbmuide dii 19:30-23:00, Vuolgga Šaldi Márkana šiljus. Busse vuodjá juohke diibmobealis ja olles diimmus. Busset ruovttoluotta vuodjigohtet dii 02:00 rájes ja dassái konseartabáiki guorrana, muitalit festiválalágideaddjit.
Lágideaddjit ávžžuhit olbmuid nuvttá bussefálaldaga ávkkástallat, unnán biilaguođđinsajiid geažil.
