-Almmuhus-
OAIVILATLuonddu­ákkasteapmi lea vuođđun dasa go mii leat ássan dain guovlluin

Luonddu­ákkasteapmi lea vuođđun dasa go mii leat ássan dain guovlluin

-

-

Mun beroštišgohten sámepolitihkas go oaivvildin ahte sámegiella ja kultuvra ii ožžon doarvái fuomášumi, Sámis ja riikadásis. Giella ja kultuvra lea guovddáš oassi mu eallimis, ja dasto lean álo bargan dan nammii ahte ovddidit juste fal dan. Servodatáŋgiruššama bokte lean maid oaidnán dehálašvuođa várjalit iežamet eatnamiid ja čáziid, vai mis lea birgejupmi min guovlluin ain boahtteáiggis.

Dál, go searvvan válggaide NSR ovddas Ávjováris, áiggun bargat dan ovddas ahte min guovlu ain bissu nanusin. Luondduákkasteapmi lea vuođđun dasa ahte mii leat ássan dáin guovlluin. Mii fertet ain sihkkarastit ahte mii beassat bivdit, guolástit ja luondduriggodagaid viežžat iežamet guovlluin. Ii galgga dainna lágiin ahte lágat ja stádabyrokratiija galget hehttehussan midjiide. Baicca leat mielde sihkkarastime ahte mii beassat ávkkástallat luonddus iežamet árvvuid vuođul. Čielga ovdamearka diekko lea lodden, mas dálá ortnet lea hehttehussan midjiide ja lea mielde jávkadeame árbevieruid dasa čadnon. Mii dárbbahit ortnegiid mat lea min árvvuin ja máhtuin vuođđuduvvon, vai mii sáhttit árbevieruid doallat ealasin, ja daid oahpahit nuoraid bulvii. Ja danne ahte NSR oaivvilda ahte lodden Guovdageainnus ferte šaddat bissovaš ortnegin mas lassi earit ja stuorát bivdoguovlu.

Mii fertet maid sihkkarastit ahte olbmot sáhttet ássat min sámi giliin. Dasa mii dárbbahit bargosajiid, orrunsajiid, fálaldagaid ja buori birrasa. Guovdageainnus mis leat earenoamáš vejolašvuođat go mis lea sihke Sámi joatkkaskuvla ja Sámi allaskuvla. Mii fertet sihkkarastit ahte sii geat háliidit dáppe gazzat oahpu sáhttet dahkat dan. Mis fertejit buorit stipeandaortnegat ja maid fállat orrunsaji, nuoraide geat gaskabođđasaččat leat orrume dáppe ja sidjiide geat áigot bisánit deike. Mii fertet maid sihkkarastit ahte sii geat ellet vuođđoealáhusain besset joatkit dainna, muhto maiddái ovdánahttit daid. Dálá dilis lea nu olu gáržžideamit mat leat duođalaš áittan vuođđoealáhusaide. Mii diehtit ahte jus dat ealáhusat jávket, de dat lea áittan maiddái min gielaide ja kultuvrii. Danne oaivvilda NSR ahte Sámediggi galggašii dál beassat váldit badjelasas boazodoallohálddašeami. Go mii diehtit gos máhttu ja diehtu min ealáhusaid birra lea – dáppe Sámis.

Sámediggi galgá lea min ovddasteaddji ja láhčit midjiide buori dili vai mii sáhttit ovdánahttit min giela, kultuvrra, árbevieruid, ealáhusaid ja muđui sámi servodateallima. Sámedikkis lea maid erenomáš dehálaš ovddasvástádus dan ovddidit guovddáš eiseválddiide ja internationála dásis. Dan dihte mun searvvan válggaide NSR ovddas. Ja mun háliidan bargan dan ovddas ahte min árbevierut ja min servodat vuoruhuvvo, ja bissu nanusin ain boahtteáiggis.

-Almmuhus-