Maŋemus guovtti vahkus leat 194 olbmo Norggas luitojuvvon giddagasas árabut go dan maid galge, váruhan dihte koronadávdda njoammumis.
Rihkusfuolahusdirektoráhtta lea mearridan ovdaláiggi luoitit olbmuid geat čohkkájit giddagasas, unnidan dihte fáŋgalogu. Ulbmil mearrádusain lea unnidit koronadávdda njoammuma sihke fáŋggaid ja bargiid gaskkas, ja ahte sii geat guhkit áigge galget leahkit giddagasas besset oktolanjas gednet ráŋggáštusa.
Sii geat ovdaláiggi luitojuvvojit giddagasas, besset juogo 10, 20 dahje 30 beaivvi ovdal go dan maid dábálaččat livčče galgan.
Buohkat geat leat gedneme ráŋggáštusa sáhttet luitojuvvot ovdaláiggi, muhto dušše jus lea sihkarvuođa ektui dorvvolaš luoitit fáŋggaid friddjan. Dát árvvoštallojuvvo juohke fáŋgga ektui.
Davvi Regiovnnas leat 32 olbmo geat leat dahje galget luitojuvvot árabut giddagasas, dieđiha Rihkusfuolahusdirektoráhta preassadieđáhusas.
