– Mun lean movttet ođđa barggus ja giittán luohttámušas, dadjá ođđa jođiheaddji maŋŋel go Sámi Árvvut searvvi jahkečoahkkin válljii su jođihit searvvi.
– Boahttevaš jagiid mis leat olu hástalusat. Mii áigut vuojulduvvat doaimmasteamet sámi árbevirolaš dieđu doarjumii, sámi mánáid ja nuoraid vuoigatvuođaid doarjumii sihke dálkkádatrievdanpolitihka váikkuheapmái, lohká ođđa ságadoalli Petra Magga-Vars.
Searvi giitá Tauno Haltta, Maarit Magga ja Siiri Juuso aktiivvalaš barggus mannan doaibmaáigodagas searvvi stivrras ja sámiid árvvuid seailuma doarjagis, čállá Sámi Árvvut searvi preassadieđáhusas.
– Áššedovdit miehtá sámi
Searvvi ságadoallin jagi 2015 rájes doaibman Juvvá Lemet lea ilolaš, ahte searvvis leat movttegis ođđa aktiivvat. – Lean hui ilus, ahte searvvi doaibma lea dorvvastuvvon ja ahte stivrras lea máŋggabeallásaččat sámi árbevirolaš dieđu eaiggádat ja áššedovdit miehtá Sámi, deattuha Näkkäläjärvi.
Searvvi doaimma ulbmilin lea váikkuheapmi láhkafidnuide, mat gusket sápmelaččaid vuoigatvuođaide, sihke riikkaidgaskasaš dásis doaimmahit ON ovttaskas olbmo váidalusa dahkat 25 sápmelačča áššeolmmožin Suoma sápmelašmeroštallamis. ON olmmošriektekomitea lea addán čovdosa jagi 2017, muhto mearrádus ii leat vel ollašuhtton. Searvi ovdánahttá iežas olggosaddindoaimma ja joatká sámi árbevirolaš dieđu oahpástaga ráhkadeami sihke Eanodaga báikenamaid vurkenfidnu.
Ođđa stivrra jođihit
Sámi Árvvut rs. čoahkkanedje jahkečoahkkimii mii lei Anáris mannan sotnabeaivvi. Jahkečoahkkimis válljejuvvui ođđa stivra doaibmaáigodahkii 2020-2021. Searvvi ságadoallin válljejuvvui Guhtur Biera Jovnna Mauri Petra, Petra Magga-Vars Vuohčus. Stivrras joatká Juvvá Lemet, Klemetti Näkkäläjärvi Eanodaga Vuottesjávrres. Ođđa lahttun leat Hánno Heaika, Heikki Paltto Leammis, Aimo Aikio Bárttehis Ja Guhtur Niillas Juhána Biggá.
