Son lea čuojahan Dronnet Sonjai sámi paviljonga rahpamis Venetsiabiennálas diibmá. Son lea maid soames háviid čuojahan ovttas eará artisttaiguin Riddu Riđus. Boahtte geasi máhccá Lávre Riddu Riđđui iežas prošeavttain, ja lohpida čuojahit ođđa šuoŋaid mat leat su guhká vurdojuvvon debuhttaálbumas.
Lávre lea nuorra sámi artista, juoigi ja musihkkár, ja lea Guovdageainnus eret. Lávre guorahallá sámi musihkkamáilmmi ovttas árvvusadnon nástejoavkkuin ja gelddolaš visuála showain, čállá Riddu Riđđu preassadieđáhusas.
Lávre leamaš miehtebiekkas musihkainis maŋimuš jagiid. Son ja Hildá Länsman vuittiiga Sámi Grand Prixa 2021:s, ja seamma jagi almmustuvai su ja Emil Kárlsena rámiduvvon skearru «Nagirvárrái».
Dál boahtá Lávre Riddu Riđđui háhkat mágihkalaš ilmmi imaštallamiin ja musikálalaš suokkardallamiin.
Čuojaha ođđa musihka
Konsearttas čuojaha ođđa šuoŋaid mat leat su debuhttaálbumas mii ilbmá čakčat.
Skearru šuoŋat leat áššiid birra mat dávjá leat čihkkojuvvon čáhcegierraga vuolábeallái; sihke sus alddis ja sámi kultuvrras. Teavsttat dovddahit nuorra dievddu jurdagiid ja miellagovaid, ja daid vuolggasadjin leat dološ luđiid metaforalaš lyrihkka.
Musihkka lea čoakkáldat ođđa luđiin, luohtelávlagiin ja árbevirolaš luđiid ođđa heivehusain ja veršuvnnain.
Ovdalis lea festivála almmuhan dáid artisttaid: Ana Tijoux, Resirkulert, Katarina Barruk ja Manne.
