-Almmuhus-
OĐĐASAT Luohti ja sámi musihkka agendas

Luohti ja sámi musihkka agendas

-

-

Sámediggeráđđi buvttii gieskat čilgehusa luođi ja sámi musihka birra, ja dat lea vuolggahan digaštallama, earenoamážit definerenoasis. Dan birra čállá sámediggeráđđi Henik Olsen dán kronihkas. 

Luohti ja sámi musihkka gullet sámi musihka eanemus guovddáš osiide, ja lea guovddážis go lea sáhka sámi álbmoga čohkkemis kultuvrralaččat, nu go maid ollu sámi festiválat čájehit. Sámediggeráđđi buvttii gieskat čilgehusa luođi ja sámi musihka birra, ja dat lea vuolggahan digaštallama, earenoamážit definerenoasis.

Beroštupmi čájeha ahte dákkár politihkalaš dokumeanta lea jearahallojuvvon, ja lea maid duogážin dasa go Sámediggeráđđi dál ovddida politihkalaš ášši dan birra Sámedikki dievasčoahkkimii.

 

Luođi ja sámi musihka definišuvnna vuolggasadji lea ahte sámi guovlluin gávdnojit máŋga sámi árbevirolaš vokálalaš ovdanbuktinvuogi; sámi guovlluin luohti čájeha árbevirolaš juoiganvugiid.

Lea sámi musihkka go luođi kombinere instrumeanttaiguin, ja/dahje sámi lyrihkain ja lávllateavsttaiguin, ja/dahje ođđaáiggi sámi musihkain jus son gii ovdanbuktá/son gii lea musihka ráhkadan ieš lea sápmelaš ja ieš musihka atná sámi musihkkan.

 

Earret luođi ja sámi musihka definišuvnna lea Sámediggeráđđi identifiseren muhtun váldohástalusaid luođi ja sámi musihka ektui.

Luohti lea earenoamáš vokálaárbevierru, musihkka- ja gulahallanvuohki, mii čájeha ahte sámi kultuvra lea ealli kulturárbi.

Luohti lea ávnnaskeahtes kulturárbi man ferte seailluhit eanet máhtu, dohkkeheami ja ealáskahttindoaibmabijuid bokte ja dan bokte ahte árvvoštallá iešguđet beliid vuoigatvuohtaaspeaktas.

Luođi oktavuođas ávnnaskeahtes kulturárbin árvvoštallojuvvojit máŋga doaibmabiju.

Institušuvnnalaš ruovttu ásaheapmi luohtái lea joatkevaš initiatiiva, ja Sámediggeráđđi evttoha ovttasbargguin guoskevaš organisašuvnnaiguin ja relevánta aktevrraiguin ásahit prošeaktajoavkku ovddidan dihte dán barggu.   

 

Norgga bealde lea joatkevaš digaštallan luohtearkiivvaide beassama birra, ja juoigit lea máŋgga láhkái viggan beassat luohtearkiivvaide.

Muhtumat áŋgiruššet dainna ahte bures vurket boares luohtebáddemiid iešguđet arkiivvaide, vai dáid ávdnasiid eat massáše ja vai boahttevaš buolvvat beasašedje daid geavahit.

Máŋga juoigi hearkkes juoiganguovlluin dovddahit ahte beassan luohtearkiivvaide lea guovddážis sidjiide sin árbevirolaš juoigamis.

Sámediggeráđđi háliida bargat viidáseabbot dáinna čuolmmain.

Sámi musihkka vásiha eanet bivnnutvuođa maŋŋá go lea eksponerejuvvon máŋgga arenas ja lávddis, ja dasa leat ISÁK ja KeiiNO buorit ovdamearkkat.

Dattetge lea váttis birget dušše sámi musihkain, ja dat adnojuvvo baskkes šáŋŋerin mas márkan ii okto buvtte ekonomalaš vuođu artisttaide, lágideddjiide ja almmuheddjiide.  

Artisttaide leat oppalaččat čuojahanbarggut mat genererejit sin dietnasa.

Festiválat, lágideaddjit, musihkkasearvvit ja sullasaččat leat danne artisttaide guovddáš premissabiddjit.

Leat máŋga hástalusa váilevaš gaskalađđasa ektui sámi musihka distribuerema oktavuođas, ja dasa háliida Sámediggeráđđi boahttevuođas fokuseret.

 

Musihkkasuorgi rievdá dađistaga, ja sámi musihkkárat šaddet eanet ahte eanet profešuneallat, ja digitaliseren buktá ođđa hástalusaid maiddái sámi musihkkáriidda.

Sámediggi háliida heivehit iežas gaskaomiid nu ahte vel buorebut heivešedje juigiid ja sámi musihkkáriid árgabeaivái.

Čilgehus galgá Sámedikki dievasčoahkkimis digaštallojuvvot geassemánu 7. beaivvi, ja mii háliidit ahte ášši loktešii luođi ja sámi musihka áigeguovdilis áššin.

 

Henrik Olsen,

Sámediggeráđi kulturovddasvástideaddji lahttu

- Advertisement -
-Almmuhus-