-Almmuhus-
-Almmuhus-
KULTUVRALuohti ja rock devddii Kárášjoga falástallanvistti

Luohti ja rock devddii Kárášjoga falástallanvistti

-

-

Go stuora joavkkut nugo Sančuari ja Intrigue čuojaheaba seamma beaivvi, de gal feastaviessu dieviha.

Kárášjoga beassášfestivála beasai luoitit 850 olbmo falástallanvistái ja go Ávvir humadii bileahttavuvdiin de ledje measta 800 bileahta vuvdon. Dáinna lei beassášfestivála beaivválaš jođiheaddji Kenneth Eliassen hui duhtavaš.

– Lean duhtavaš go ná ollu olbmot leat boahtán. Eahket lea fiinnis ja eai leat makkár ge váttisvuođat leamaš, dajai son Ávvirii.

 

Ollu gávttehasat

Beassášlávvordaga čuojahedje Ivan Buljo, Ágy, Sančuari ja Intrigue Kárášjogas. Nuorra artistta Ivan Buljo álggahii feastta, muhto go son čuojahii de eai lean vuos ollen go moaddelogi olbmo falástallanvistái.

Go Sančuari čuojahišgođii, de dievvagođii ge maid falástallanvistti. Lávddi ovddabeallai ledje čoahkkanan ollu olbmot ja dán jagi ledje maid hui ollu gávttehasat čoahkkanan Kárášjoga falástallanvistái.

– Ovdditháve go čuojaheimmet dáppe de ledje oalle ollu gávttehasat geahččamen, muhto dál gal ferten rámidit min gehččiid. Mun in oaidnán nu beare galle dakkára geain ledje dáččabiktasat, ledje measta dušše gávttehasat ja dan gal lea máilmmi suohtas oaidnit ja de lea maid suohtas juoigat ja čuojahit lávdde alde, dadjá Sančuari juoigi Svein Egil Oskal. 

 

– Šaddan dego vierru

Buletjávrri áiggi rájes lea Sančuari čuojahan beassášlávvordaga Guovdageainnus, ja Guovdageainnus lávege eallin go Sančuari lávke lávddi ala. Ávvir jearrala movt dat lea čuojahit Kárášjogas beassášlávvordaga.

– Olbmot Guovdageainnus dieđus vurde ahte mii čuojahit Báktehárjjis, go dat han lea šaddan measta dego vierru. Muhto Kárášjogas leat maid beassášdoalut, ja mun in jáhke Kárášjohka suoláda gehččiid Guovdageainnus ja Guovdageaidnu ges Kárášjogas vaikke gos mii čuojahit. Dáppe leat maid ollu olbmot ja min mielas gal lea suohtas dáppe maid čuojahit. Mis leat ollu fánsat ja oahppásat dáppe maid, dadjá Svein Egil.

 

– Measta 300 jagi boarrásat

Sančuari ii leat čuojahan beassážiid maŋemus moadde jagi, ja Svein Egil muitala ahte son lea buohcan ja danne  ii leat sáhttán čuojahit.

– Maŋemus go čuojaheimmet beassášlávvordaga, de čuojaheimmet maid dáppe. Otne mii leat dáppe ja dál han čuojaha min stuora násti, Isák, Guovdageainnus ja nuorat gal baicca háliidit su geahččat. Mii hal goit leat jo measta 300 jagi boarrásat oktiibuot, boagusta Svein Egil.

 

Ain bivnnuhat

Vaikko vel Sančuari čuojaheaddjit leat ge moadde jagi boarráseappo go maŋemus go čuojahedje beasášlávvordaga, de leat sii ain bivnnuhat. Olbmot juiget mielde go beakkán luođit nu go «Stállangazza» ja «Nils Jøran» skádjet skájanasain.

– Mii juoigat dan juoiganmálle máid earret eará Guovdageainnus, Kárášjogas, Gárasavvonis ja Heahtás juiget. Dát juoiganmálle geasuha nuoraid, sii cogget gávttiid ja messostallet ja besset deaivat eará guovllu nuoraid, čilge Svein Egil ja loahpaha:

– Dál mii leat boarráseappot, nu ahte eat nagot nu guhká gohccit. Danne čuojaheimmet dál árabut go lávet. Duot Intrigue olbmát leat veaháš nuorabut go mii, nu ahte sii dat loahpahit eahkeda otne.

-Almmuhus-