Dán jagaš fáddá lea Vilda duoddarat ja dainna fáttáin háliida Ijahis Idja čalmmustahttit Eanodaga ja eará oarjjabeale sámeguovlluid luohteárbevieru ja ođđaset sámemusihka.
Dán jagaš fáddá lea Vilda duoddarat ja dainna fáttáin háliida Ijahis Idja čalmmustahttit Eanodaga ja eará oarjjabeale sámeguovlluid luohteárbevieru ja ođđaset sámemusihka.
Festivála lágiduvvo goalmmát vahkkoloahpa borgemánus Anáris jo 20. geardde. Festiválafálaldahkii gullá maiddái mánáid- ja nuoraidbeaivi, musihkkaseminára sámemusea Siiddas ja klubbaeahkedat main sámemusihkka lea guovddážis.
Dáhpáhus álgá duorastaga 13.b. Inger-Mari Aikio mánáid cd:a ”Ima Mánážat” almmustahttinkonsearttain, Sajosa auditorias.
Bearjadaga ges álgá mánáid- ja nuoraidbeaivi seamma konsearttain. Konseartta lassin bearjadatiđida auditorias čájehuvvojit oanehisfilmmat ja animašuvnnat. Ijahis ija násttážat–nuoraidkonsearttas loaiddastit mánát ja nuorat iežaset joavkkuid, ja rock-joavku SomBy.
Vuosttaš háve Suomas
Festivála stuorámus násti lea ruoŧasápmelaš Jon-Henrik Fjällgren musihkkajoavkkuinis. Fjällgren loaiddasta vuosttas háve Suomas, Ijahis ijas. Su konsearta lea bearjadateahkeda Sajosa auditorias.
Bearjadatbeaivvi loahpaha Johtti–klubba. Musihka jođiha Juoigiid Searvi, ja UMK-gilvvu dovdosat Hildá Länsman ja DJ Eeverest.
Musihkkaseminára
Lávvardatbeaivi álgá musihkkaseminárain sámemusea Siiddas. Seminára fáddán lea Vilda duoddarat ja das oahpásmuvvat oarjjabeale ja erenomážit Eanodaga guovllu musihkkaárbevirrui ja artisttaide.
Seminára sáhkavuorut gieđahallet luohteárbevieru, luođi mearkkašumi, luođi ovdanbuktima árbevirolaččat ja modearna vugiin.
Lávvordaga konseartaeahket
Lávvordaga maŋŋelgaskabeaivvi lea Arvvas konseartta Sajosa auditorias. Auditoriakonseartta maŋŋel álgá Ijahis ija váldokonsearta Sajosa šiljus.
Konsearttas gulat Wimme, Elle Márjá Eira, ja Iŋgá-Máret Gaup-Juuso ođđa musihkkajoavkuin Mingá. Dasa lassin fáttá mielde gullat juigiid birra, ja juoigit bohtet earret eará Juoigiid Searvvis. Rock-joavkkut SomBy ja Mollet loahpaheaba konseartaeahkeda.
