-Almmuhus-
-Almmuhus-
-Almmuhus-
OĐĐASAT– Lunddolaš ovttasbargat, go mis leat seamma vásáhusat

– Lunddolaš ovttasbargat, go mis leat seamma vásáhusat

-

-

Nu lohká sámediggepresideanta go odne Árktalaš eamiálbmogiid oahpahuskonferánssa AIEC2016 oktavuođas vuolláičálle Kalaallit Nunaat, Manitoba, Nunavut ráđđehusat ja Sámediggi ovttasbargošiehtadusa oahpahusa birra.

Sámediggepresideanta Aili Keskitalo muitala dat soahpamuš mearkkaša oahpahusovttasbarggu mii lea doaimmahuvvon máŋgalogi jagi čađa lea nannejuvvon politihkalaš dásis.

– Politihkalaš njunnošat iešguđet árktalaš guovlluin dáhkidit doarjaga ovttasbargui ja lohpidit várret resurssaid jahkásaččat ja sihkkarastit ahte dákkár fágalaš deaivvadeamit, nu go dat konferánsa, mii dál lágiduvvo Guovdageainnus, dollojuvvojut juohke goalmmát jagi, lohká son.

 

The Northwest Territories ii čállán vel vuollái go sis lea aiddobáliid válljejuvvon ođđa ráđđehus, ja dat dárbbašit veaháš áiggi mannat čađa šiehtadusa.

 

Ovttas ruhtadit

Keskitalo lohká lunddolažžan daidda guovlluide ovttasbargat, muhto lea resursagáibideaddji, ja nu galgetge dál buot ovttasbargoguoimmit oktii bidjat ruhtadeami mii álkida konferánssaid čađaheami.

– Mis leat nu ollu oktasaš hástalusat ja vásáhusat, ja lea hui ávkkálaš ovttasbargat, dan sadjái go juohkehaš ieš bargá dan seamma. Dálá teknologiija álkida ovttasbargovejolašvuođaid ollu buorebut go ovdal sáhtii, lohká son.

 

Seamma ulbmilat

Keskitalo lohká lea dehálaš láhčit vejolašvuođa dutkiide, oahpaheddjiide ja fágačehpiide deaivvadit ja lonohallat vásáhusaid ja dieđuid.

– Mii leat oaidnán konferánssas stuora inspirašuvnnain movt eará guovlluin čovdet daid seamma hástalusaid mat mis leat. Oahpahusvuogádat lea nu issoras dehálaš midjiide eamiálbmogiidda, go dan bokte sáhttit mii nannet dan maid mii leat massán muhtun muddui. Norgga bealde lea oahpahus geavahuvvon stádaid bealis, nu movt dáruiduhttimii sámiid vuostá, ja jus mii nákcet dan váldit ruovttoluotta sámáidahttimii, de livččii dat stuora vuoitun sámi álbmogii. Dákkár konferánssain sáhttit oahppat movt eará guovlluin dan dahket, go sis leat juste seamma ulbmilat go mis, lohká Keskitalo.

(Ášši joatká gova vuolábealde)


Ruonáeatnama oahpahus-, dutkan-, kultur- ja girkoministtar Nivi Olsen oaivilda sidjiide lea ovttasbargu stuora ávkin.

Nuorra oahpahusvuogádat

Ruonáeatnama oahpahus-, dutkan-, kultur- ja girkoministtar Nivi Olsen lohká dát šiehtadus mearkkaša sidjiide hui ollu.

– Min oahpahusvuogádat Ruonáeatnamis lea hui nuorra, ja go geahččalit gávdnat buriid čovdosiid movt hukset bajás oahppanvejolašvuođaid, de lea midjiide hui dehálaš dákkár árktalaš ovttasbargu, sámiiguin ja earáiguin. Lean hui positiivvalaš dasa ahte mii ovttas nákcet oažžut buriid bohtosiid.

 

Ieža ávkkástallagoahtit

Olsen lohká sidjiide lea dehálaš ahte nuorra olbmot galget oažžut vejolašvuođa oahpu váldit, go nuorat leat sin boahtteáigi.

– Mis leat Ruonáeatnamis hui stuora ja dehálaš resursavejolašvuođat, muhto eat sáhte ávkkástallat daid go min oahppodássi lea nu vuollin. Danne sáhttit ovttasbarggu dáfus oahppat earáin movt galgat oahpahusa hukset bajás, nu ahte mii beassat iežamet resurssaid ávkkástallat dan sadjái go eará gievrras riikkat bohtet ávkkástallat min riggodagaid.

 

 

 

 

 

 

 

 

 

 

 

-Almmuhus-